Бітва за найбольшае возера ў свеце
- 28.07.2026, 16:38
Каспійскае мора стала новай арэнай супрацьстаяння Расіі, Украіны і Ірана
Каспійскае мора імкліва ператвараецца ў адну з ключавых кропак геапалітычнага супрацьстаяння. Пасля нядаўніх удараў украінскіх беспілотнікаў па судах у акваторыі канфлікты вакол Украіны і Ірана ўпершыню настолькі відавочна перасекліся на найбольшым у свеце замкнёным вадаёме, піша CNN (пераклад — сайт Charter97.org).
Прэзідэнт Украіны Уладзімір Зяленскі заявіў, што украінскія сілы атакавалі расійскія судны, якія перавозілі ваенныя грузы з Ірана, а таксама расійскі ракетны катэр. Са свайго боку Тэгеран заяўляе, што пад удар трапіла камерцыйнае судна з грузам жалеза, якое ішло з расійскага порта Астрахань у іранскі Энзелі. Паводле даных іранскага боку, адзін марак загінуў, яшчэ трое атрымалі раненні.
Напружанасць хутка ўзрасла. Прадстаўнік МЗС Ірана Эсмаіл Багаі папярэдзіў, што «небяспечны авантурызм Украіны без адказу не застанецца», пасля чаго часовы павераны ў справах Украіны быў выкліканы ў знешнепалітычнае ведамства Ірана.
Як адзначае CNN, значэнне Каспійскага мора рэзка вырасла пасля ўскладнення суднаходства праз Персідскі заліў і Аманскі заліў. Паводле слоў аналітыка Біджана Хаджэпура, сёння Каспій з'яўляецца «стратэгічным дадаткам» да традыцыйных марскіх маршрутаў Ірана і дазваляе развіваць гандаль з Расіяй, краінамі Каўказа, Цэнтральнай Азіі і Кітаем.
Маршрут праз Каспій мае і ваеннае значэнне. Менавіта ім у першыя гады вайны Расія атрымлівала іранскія ўдарныя беспілотнікі Shahed, а пазней, паводле дадзеных заходніх уладаў, гэтым шляхам маглі пастаўляцца і іншыя ўзбраенні. «Будзь-якая перадача іранскіх балістычных ракет Расіі стане сур'ёзнай эскалацыяй», — раней папярэджвалі ў адміністрацыі ЗША.
Апошнія ўкраінскія ўдары дэманструюць не толькі ўзрослыя магчымасці далёкабійных беспілотнікаў, але і імкненне Кіева парушыць лагістыку, якая падтрымлівае расійскую ваенную кампанію. Акрамя таго, атакі сталі сігналам, што Украіна разглядае Іран як аднаго з ключавых пастаўшчыкоў узбраенняў для Масквы.
Каспійскае мора паступова ператвараецца не толькі ў найважнейшы гандлёвы калідор, але і ў новую стратэгічную пляцоўку, дзе ўсё цясней пераплятаюцца інтарэсы Расіі, Ірана, Украіны і заходніх краін.