Беларускай скаротылі пенсійны стаж з-за савецкага дыплома

• 29.07.2026, 9:20

У дакуменце не хапала аднаго запісу.

Адсутнасць аднаго запісу ў савецкім дыпломе аб заканчэнні вучэбна-курсачнага камбіната Міністэрства бытавога абслугоўвання БССР ледзь не пазбавіла беларуску даплаты да пенсіі, расказалі у Магілёўскім абласным аб'яднанні прафсаюзаў.

Жанчына скончыла навучальную ўстанову ў 1988 годзе. Усяго падрыхтоўка спецыялісткі заняла дзевяць месяцаў. Аднак у пасведчанні савецкага ўзору, якое выдалі выпускніцы, адсутнічалі звесткі пра дзённую форму навучання. З-за гэтага спецыялісты ўпраўлення па працы, занятасці і сацыяльнай абароне райвыканкама не залічылі ёй у стаж перыяд яе навучання.

Прафсаюз абскардзіў гэтае рашэнне. У пенсійнае пасведчанне жанчыны ўнеслі выпраўленні, і дзевяць месяцаў навучання залічылі.

Агульны стаж работніцы склаў 40 гадоў 8 месяцаў і 11 дзён. Гэта дазволіла ёй атрымаць законную штомесячную даплату да пенсіі.