Wildberries перабіраецца ў Казахстан?
- 29.07.2026, 12:01
Кампанія гатовая заняць усе даступныя ў краіне склады.
Кампанія Wildberries шукае альтэрнатыву расійскім складам у Казахстане пасля серыі атак БПЛА на свае лагістычныя аб’екты, паведаміў «Коммерсант» са спасылкай на крыніцы.
Ідзе гаворка пра плошчы ў 100 тыс. кв. м, удакладнілі суразмоўцы выдання. Адзін з іх лічыць, што кампанія гатовая заняць усе даступныя ў краіне склады, улічваючы абмежаваную прапанову.
У прэс-службе RWB пацвердзілі планавую працу па будаўніцтве лагістычных аб’ектаў у краінах прысутнасці, у тым ліку ў Казахстане: у Алматы будуецца аб’ект больш як на 100 тыс. кв. м, у Астане — на 160 тыс. кв. м з увядзеннем у эксплуатацыю ў наступным годзе.
Налёты ўкраінскіх дронаў на склады Wildberries, што пачаліся 18 ліпеня, прымусілі кампанію шукаць новыя спосабы абароны інфраструктуры. Паводле звестак СМІ, ужо выбыла мінімум чатыры лагістычныя комплексы на 444 тыс. кв. м — гэта каля 8% ад агульнага аб’ёму плошчаў (5,6 млн кв. м).
У выніку ўладальнікі свабодных складоў у Расіі, паводле слоў крыніц «Коммерсанта», не гатовыя падпісваць новыя дагаворы арэнды з Wildberries. Прычына — нежаданне браць на сябе рызыкі: аб’екты арандатара такога профілю ператвараюцца ў мэту удараў, а стандартныя страхавыя палісы не пакрываюць шкоду ад атак БПЛА і ваенных дзеянняў.
Аднак знайсці 100 тыс. кв. м у Казахстане няпроста. Паводле IBC Global, на канец чэрвеня 2026 г. аб’ём свабодных плошчаў у краіне складае 130 тыс. кв. м, але яны раскіданыя па розных гарадах, і адзінага блока няма. Пры гэтым кошт арэнды ў Казахстане практычна зраўнаваўся з маскоўскімі стаўкамі: сярэдні кошт — каля 10,3 тыс. руб. за 1 кв. м у год супраць 10,5 тыс. у Маскве і Падмаскоўі.
Эксперты сумняваюцца ў эканамічнай мэтазгоднасці пераарыентацыі тавараў расійскіх прадаўцоў у Казахстан. Гендырэктар «Infoline-Аналітыкі» Міхаіл Бурмістраў адзначае, што гэта можа сябе не апраўдаць з пункту гледжання тэрмінаў і кошту дастаўкі. Тым не менш лагістычныя кампаніі ўжо фіксуюць рост папулярнасці маршрутаў праз Казахстан з-за лепшай даступнасці паліва і стабільных цэн.