Зяленскі папрасіў у Трампа тэрміновы «зімовы пакет» для Patriot

• 29.07.2026, 13:15

Украіна хоча сабраць 300 ракет-перахопнікаў да пачатку зімы.

Прэзідэнт Украіны Уладзімір Зяленскі падчас сустрэчы ў Вашынгтоне папрасіў прэзідэнта ЗША Дональда Трампа даць Кіеву тэрміновы «зімовы пакет» ракет-перахопнікаў для сістэм СПА Patriot.

Пра гэта Зяленскі заявіў у інтэрв'ю Axios.

Паводле слоў Зяленскага, Украіна хоча сабраць 300 ракет-перахопнікаў да пачатку зімы.

Украінскія запасы ракет-перахопнікаў амаль вычарпаныя, і без іх краіна не можа абараніцца ад балістычных ракет. Таму Украіна не змагла спыніць нядаўнія расійскія атакі на Кіеў.

Калі гэтую праблему не вырашаць да зімы, расійскія атакі могуць знішчыць украінскія электрастанцыі, пакінуўшы без святла і ацяплення мільёны ўкраінцаў і стварыўшы гуманітарны крызіс.

Прэзідэнт Украіны падкрэсліў, што пасля таго як Украіна атрымае ліцэнзіі ад ЗША, вытворчасць вялікай колькасці ракет-перахопнікаў зойме ад аднаго да пяці гадоў.

Паводле слоў Зяленскага, такі графік не працуе.

«Нам Patriot былі патрэбныя яшчэ ўчора», — сказаў ён.

Прэзідэнт адзначыў, што Расія выкарыстоўвае ад 30 да 40 балістычных ракет падчас кожнага буйнага ўдару па Украіне. Расіяне здзяйсняюць ад трох да пяці такіх атак штомесяц.

Нагадаем, 28 ліпеня прэзідэнт Украіны Уладзімір Зяленскі прыбыў з візітам у Вашынгтон і сустрэўся з амерыканскім прэзідэнтам Дональдам Трампам.

Лідары абмеркавалі вытворчасць перахопнікаў для ЗРК Patriot, актывізацыю перамоўнага працэсу і не толькі.

Паводле слоў Трампа, сустрэча прайшла «вельмі добра».

Акрамя таго, ўчора Сенат ЗША падчас працэдурнага галасавання падтрымаў законапраект аб узмацненні санкцый супраць Расіі і Ірана, адным з аўтараў якога быў сенатар-рэспубліканец Ліндсі Грэм.