Названыя самыя папулярныя імёны нованароджаных у Мінску

• 29.07.2026, 15:59

Сярод рэдкіх варыянтаў з'явіліся Ізабэль, Еўфрасіння, Альгерд і Астап.

Галоўнае ўпраўленне юстыцыі Мінгарвыканкама расказала, якія імёны найчасцей давалі нованароджаным мінчукі ў першым паўгоддзі 2026 года.

Сярод дзяўчат лідэрамі сталі Сафія і Ганна — тут ніякіх сюрпрызаў, усё як і прыкладна апошнія пяць гадоў. Таксама ў лік самых папулярных імёнаў увайшлі Ева, Марыя і Васіліса.

У хлопчыкаў у топе апынуліся імёны Міхаіл, Марк, Мацвей, Раман і Аляксандр. Тут таксама трэнды вельмі ўстойлівыя.

Разам з тым у сталіцы захоўваецца цікавасць і да рэдкіх імёнаў. Так, сярод дзяўчат сустракаліся Ізабэль, Еўфрасіння, Лаўра і Джэніфер, а сярод хлопчыкаў — Альгерд, Сільвестр, Тэадор і Астап.

У той жа час некаторыя імёны, якія яшчэ нядаўна былі даволі распаўсюджанымі, сёння сустракаюцца значна радзей. Напрыклад, сярод жаночых да такіх імёнаў адносяцца Марына і Ілона.