«Як будаваць — нікога, як стужачку перарэзаць — дык чарга»

• 29.07.2026, 19:49

У Брэсце чыноўнікі з пыхай адкрылі дзве спартыўныя пляцоўкі.

У Брэсце з пыхай і афіцыйнымі прамовамі 28 ліпеня адкрылі дзве шматфункцыянальныя спартыўныя пляцоўкі. Яны з’явіліся каля гімназіі № 3 і сярэдняй школы № 28.

Гарадскія ўлады паведамілі, што спартыўныя пляцоўкі адкрылі ў межах рэспубліканскага праекта «Спорт для ўсіх» пры падтрымцы Прэзідэнцкага спартыўнага клуба.

На мерапрыемствы сабралі школьнікаў розных узростаў, якім раздалі дзяржаўныя сцягі і чырвона-зялёныя шары. Чыноўнікі ўрачыста перарэзалі стужкі.

Гэтую пампезнасць пачалі актыўна абмяркоўваць карыстальнікі ў сацсетках. Як піша выданне BG.Мedia, берасцейцы не спрачаліся з тым, што новыя спартыўныя пляцоўкі патрэбныя. Людзі адзначалі, што маштаб цырымоніі несупастаўны з самімі аб’ектамі:

«Як будаваць — нікога, як стужачку перарэзаць — дык чарга».

«Калі ж гэты “савок” ужо кане ў Лету. Стужачкі, камеры, чынушы… Самім не сорамна адкрываць са стужачкамі тое, што і так павінна быць? Адкрыццё, напэўна, даражэйшае за саму пляцоўку».

«Адкрываць павінны тыя, хто яе будаваў, а не тыя, хто нічога не зрабіў».

«Дзіўныя, вядома, гэтыя ўсе адкрыцці».

«Вось табе і падзея. За 50 гадоў вырашылі нешта зрабіць».

«Адкрыццё пляцоўкі — на ўзроўні Дня Перамогі. Вось і дажыліся».