Украіна страціла знішчальнік F-16

• 29.07.2026, 23:29

Пілот паспеў катапультавацца.

29 ліпеня была страчана сувязь са знішчальнікам F-16 падчас баявога задання на перахоп паветраных мэт праціўніка. Пілоту ўдалося катапультавацца.

Пра гэта паведамляюць Паветраныя сілы ЗСУ.

Паводле заявы Паветраных сіл, сувязь са знішчальнікам была страчана 29 ліпеня 2026 года. Пілот выконваў баявое заданне — перахоп паветраных мэт праціўніка.

«Па папярэдніх дадзеных, на борце самалёта адбылася няштатная сітуацыя, лётчык быў вымушаны катапультавацца», — адзначылі ў Паветраных сілах.

Паводле інфармацыі вайскоўцаў, пілот знаходзіцца ў поўнай бяспецы. Яго эвакуявалі і даставілі ў медыцынскую ўстанову для агляду і дыягностыкі.

У Паветраных сілах паведамілі, што на месцы падзення працуюць эксперты і праваахоўнікі. Ахвяр сярод грамадзянскага насельніцтва і разбурэнняў не зафіксавана.

Прычыны інцыдэнту ўстанаўліваюцца.