Науру разарвала дыпламатычныя адносіны з Абхазіяй і Паўднёвай Асеціяй

• 30.07.2026, 4:59

У Міністэрстве замежных спраў самапрагалошанай Абхазіі назвалі прычыну.

Рэспубліка Науру спыніла дыпламатычныя адносіны з Абхазіяй і Паўднёвай Асеціяй. Пра гэта паведамілі грузінскія СМІ са спасылкай на Міністэрства замежных спраў Грузіі.

У Міністэрстве замежных спраў самапрагалошанай Абхазіі заявілі, што рашэнне Науру было «вымушаным» і стала вынікам знешняга ціску. Абхазскі бок сцвярджае, што пасля таго, як Науру ў 2009 годзе прызнала незалежнасць Абхазіі, паміж краінамі нібыта развіваліся палітычны дыялог і супрацоўніцтва.

У заяве МЗС Абхазіі адзначаецца, што адносіны паміж дзвюма краінамі нібыта сутыкаліся з супрацьдзеяннем з боку Грузіі і яе заходніх партнёраў. Паводле звестак абхазскага ведамства, пасля пераходу сумесных праектаў у практычную плоскасць супраць Науру пачалася кампанія «знешняга ціску», якая ўключала палітычны і дыпламатычны ўплыў, а таксама эканамічныя абмежаванні.

Паводле інфармацыі Міністэрства замежных спраў Грузіі, урад Науру 21 ліпеня прыняў рашэнне аб спыненні дыпламатычных адносін з Абхазіяй і Паўднёвай Асеціяй.

Науру — невялікая востраўная дзяржава ў Ціхім акіяне. У 2009 годзе яна прызнала незалежнасць Абхазіі і Паўднёвай Асеціі, якія большасць краін свету разглядаюць як часткі тэрыторыі Грузіі. Таксама гэта зрабілі дзве іншыя падобныя краіны — Вануату і Тувалу, але яны адклікалі сваё прызнанне яшчэ раней. Пасля ж адступлення Науру ў свеце засталіся, акрамя Расіі, усяго тры дзяржавы, якія афіцыйна прызнаюць марыянетачныя ўтварэнні на Паўднёвым Каўказе — Венесуэла, Нікарагуа і Сірыя.