Вялікабрытанія, Італія і Японія распрацоўваюць новы знішчальнік

• 5.07.2026, 19:15

З кіраваннем на аснове штучнага інтэлекту.

Вялікабрытанія, Італія і Японія падпісалі кантракт на 6,14 мільярдаў долараў для працягу сумеснай распрацоўкі баявога самалёта новага пакалення, паведамляе The Japan Times.

Праектам кіруе спецыяльна створанае сумеснае прадпрыемства Edgewing, штаб-кватэра якога знаходзіцца ў Вялікабрытаніі, а ўзначальвае яго італьянскі спецыяліст. У кансорцыум уваходзяць гіганты абароннай прамысловасці: брытанская BAE Systems, італьянская Leonardo і японская Mitsubishi Heavy Industries.

Вынікам супольнай працы стане двухрухавіковы стэлс-знішчальнік шостага пакалення. Распрацоўшчыкі плануюць, што машына паступіць на баявое дзяжурства да 2035 года ў якасці шматмэтавага паветранага каманднага пункта, абсталяванага штучным інтэлектам і «зброяй накіраванай энергіі». Новы знішчальнік будзе мець даўжыню каля 20–21 метра і характэрнае шырокае крыло. Па габарытах ён будзе супастаўны з цяжкім амерыканскім F-15.

Самалёт зможа развіваць звышгукавую хуткасць і падымацца на вышыню амаль 20 кіламетраў. Плануемая далёкасць палёту на адной запраўцы складзе больш за 1500 кіламетраў, што дазволіць эфектыўна дзейнічаць у Інда-Ціхаакіянскім рэгіёне і Паўночнай Атлантыцы. Грузападымальнасць знішчальніка будзе ўдвая вышэйшая, чым у F-35A, пры гэтым усё ўзбраенне будзе схавана ва ўнутраных адсеках для забеспячэння малазаметнасці. Самалёт плануюць абсталяваць сістэмамі радыёэлектроннай барацьбы, перадавымі радарамі і мікрахвалевай зброяй высокай магутнасці.

Кабіна пілота будзе нагадваць лятучы камандны цэнтр. Нейрасеткі аб’яднаюць даныя з усіх датчыкаў, вывад інфармацыі будзе ажыццяўляцца праз дапоўненую рэальнасць. Акрамя таго, адкрытая архітэктура праграмнага забеспячэння дазволіць лёгка абнаўляць сістэмы самалёта і інтэграваць у баявыя дзеянні беспілотнікі, якімі знішчальнік зможа кіраваць падчас бою.