На беларуска-латвійскай мяжы выяўлены падземны тунэль

• 11.08.2026, 19:32

У 10 метрах ад загараджальнага збудавання.

На мяжы з Беларуссю ў ноч на 11 жніўня памежнікі выявілі падземны тунэль, паведамляе Дзяржаўная памежная ахова Латвіі.

Як адзначана ў паведамленні, тунэль знаходзіцца ў зоне адказнасці Сіленскага памежнага ўпраўлення, у 10 метрах ад загараджальнага збудавання.

Праз яго незаконна перасеклі мяжу 15 мігрантаў — усе яны былі затрыманыя і вярнутыя на тэрыторыю Беларусі.

Ведамства падкрэслівае, што гэта першы зафіксаваны выпадак выкарыстання тунэля для нелегальнага перасячэння латвійскай мяжы. «Раней у гэтым месцы не было выяўлена ніякіх прыкмет парушэння, і не было зафіксавана ніводнага затрымання асоб, якія незаконна перасякалі дзяржаўную мяжу», — адзначае памежная служба.

Як паведамляе партал Delfi, тунэль выяўлены побач з пунктам пропуску Сілене (на беларускім баку яму адпавядае Урбаны, закрыты восенню 2023 года).

Прэм'ер-міністр Латвіі Андрыс Кулбергс 11 жніўня заявіў, што перапраўленне нелегальных мігрантаў з'яўляецца наладжаным бізнесам, якім займаюцца арганізаваныя злачынныя групоўкі, звязаныя з Расіяй. Паводле яго слоў, важна не толькі ўзмацніць кантроль самой мяжы, але і адсочваць перамяшчэнне транспарту ўжо ўнутры краіны.

Кіраўнік урада адзначыў, што для ўмацавання бяспекі на мяжы разглядаюцца ўсе магчымыя меры барацьбы з нелегальнай міграцыяй, а цяперашні паток мігрантаў у Латвію ён ахарактарызаваў як высокі.

Таксама стала вядома пра запуск аперацыі пад назвай Vilkatis («Ваўкалак»), накіраванай на супрацьдзеянне нелегальнай міграцыі. У яе рамках плануецца больш актыўна ўжываць сучасныя тэхналогіі — у памежнай зоне пашыраць выкарыстанне беспілотных авіяцыйных сістэм для больш эфектыўнага выяўлення і затрымання нелегальных мігрантаў.

Кулбергс дадаў, што сярод мер бяспекі, якія разглядаюцца, — закрыццё пункта пропуску Патэрніекі (з беларускага боку — Грыгораўшчына), хоць асноўны паток нелегальнай міграцыі фіксуецца не на самім пункце пропуску, а на прылеглых да яго ўчастках мяжы.