У Беларусі масава затрымліваюць фуры з Калінінграда

• 11.08.2026, 20:27

Фуры «стаўяць на прыкол» на нявызначаны тэрмін.

Перавозчыкі з Калінінграда сутыкнуліся з масавымі затрымкамі фур на тэрыторыі Беларусі, паведамляе расійскі рэгіянальны партал «Клопс».

Паводле звестак выдання, пры перасячэнні літоўска-беларускай мяжы расійскія фуры «здымаюць з лініі» і пакідаюць на экспертызу, якая можа зацягнуцца на некалькі месяцаў. Як вынікае з публікацыі, гэта адбываецца ўжо на беларускім баку.

Пасля падачы дакументаў вадзіцелям на мяжы паведамляюць, што фуру «стаўяць на прыкол» на нявызначаны тэрмін. Прадстаўнік адной з транспартных кампаній Іван Зайцаў патлумачыў, што гаворка ідзе пра «праверку дакладнасці дакументаў» — пры гэтым паперы на адзін з затрыманых грузавікоў былі выдадзеныя калінінградскай Дзяржаўтаінспекцыяй яшчэ ў лютым 2026 года.

Праблема, як адзначаецца, закранае не адзін пункт пропуску на літоўска-беларускай мяжы — у агульнай складанасці можа ісціся прыкладна пра 300 машын з Калінінграда. «Толькі на адным з памежных пераходаў ужо назбіралася з дзясятак падобных грузавікоў», — гаворыцца ў публікацыі.

Па словах Зайцава, тэрміны праверкі могуць моцна зацягвацца: яго ўласны цягач прастойвае ўжо каля тыдня, тады як іншыя перавозчыкі распавядалі пра прастой у тры–чатыры месяцы і даўжэй.

Асабліва востра праблема стаіць для тых, хто перавозіць хуткапсавальныя грузы. Кампанія Зайцава займаецца дастаўкай падвеснога мяса, тэрміны перавозкі якога жорстка абмежаваныя. «Нам даюць усяго чатыры дні на дастаўку з выездам адсюль», — распавёў ён.

Па яго словах, у такой сітуацыі даводзіцца шукаць іншы цягач, каб забраць прычэп і не сарваць пастаўку. Паскардзіўся Зайцаў і на ўмовы, у якіх апынаюцца дальнабойшчыкі: «Цягачы ставяць у адстойнік, дзе няма ні кавярні, ні крамы».

Адзначаецца, што кампаніі, занятыя грузаперавозкамі на гэтым накірунку, нясуць праз затрымкі значныя страты.