Беларус сабраў бомбу ў расійскім СІЗА

• 12.08.2026, 8:18

Хацеў уразіць сукамернікаў.

Суд Людзінаўскага раёна ў Расіі вынес прысуд грамадзяніну Беларусі за незаконнае вырабленне выбуховых рэчываў і спробу сабраць выбуховую прыладу. Адметнасць справы ў тым, што мужчына задумаў зрабіць бомбу, ужо знаходзячыся ў расійскім СІЗА. Пра незвычайны выпадак паведамляе партал «Моцныя навіны».

Раней судзімы беларус адбываў пакаранне ў СІЗА-2 горада Людзінава Калужскай вобласці. Аўтарытэт сярод сукамернікаў ён вырашыў заваяваць не фізічнай сілай, а ведамі ў фізіцы і хіміі.

Першы чарцёж выбуховай прылады сапраўды ўразіў сукамернікаў, аднак малюнак канфіскавала ахова. Другая спроба аказалася больш выніковай: намаляваўшы новую схему бомбы, мужчына прыступіў непасрэдна да выраблення выбуховага рэчыва, выкарыстоўваючы серу з запалак і алюмініевы парашок з лекавых прэпаратаў.

У судзе мужчына сцвярджаў, што падпаліў атрыманую сумесь выключна дзеля таго, каб прадэманстраваць сукамернікам прынцып гарэння, а ўзрываць следчы ізалятар не планаваў — нягледзячы на непадробную цікавасць да хіміі і беспілотнікаў.