Чачэнцы адмаўляюцца ваяваць за «рускі мір»

• 12.08.2026, 10:53

Кадыраў абмяжоўваецца публічнай лаяльнасцю.

У Чачні вайна Расіі супраць Украіны амаль не адчуваецца. У Грозным захоўваецца спакойная абстаноўка, а ў мясцовым мемарыяле практычна няма сведчанняў маштабнага ўдзелу рэспублікі ў баявых дзеяннях. Пры гэтым кіраўнік Чачні Рамзан Кадыраў працягвае дэманстраваць публічную лаяльнасць Уладзіміру Пуціну і заяўляць пра істотны ўнёсак рэспублікі ў вайну, піша The Economist (пераклад — сайт Charter97.org).

Кадыраў заяўляе, што з Чачні на фронт былі накіраваныя каля 70 880 чалавек — амаль 9% мужчынскага насельніцтва. Аднак статыстыка страт выглядае інакш. Паводле падлікаў «Медыязоны», пацверджаная гібель 539 чачэнцаў, што складае каля 0,2% расійскіх страт пры долі Чачні прыблізна ў 1,1% насельніцтва краіны.

Выданне звязвае гэта з уплывам Кадырава, якому ўдалося абараніць рэспубліку ад маштабнай мабілізацыі. Пасля двух чачэнскіх войнаў мясцовыя жыхары не гараць жаданнем ваяваць за так званы «рускі мір».

Пры гэтым вайна стала для Кадырава інструментам умацавання ўласнай улады. Падраздзяленне «Ахмат» пад камандаваннем Апці Алаудзінава ператварылася ў адзін з найбольш прыкметных сімвалаў чачэнскага ўдзелу ў канфлікце. «Яго байцоў нярэдка называюць TikTok-войскамі», — адзначаюць аўтары.

У той жа час чачэнскія ўлады выкарыстоўваюць ціск і фінансавыя стымулы для набору кантрактнікаў. Ад раённых аддзелаў паліцыі патрабуюць адпраўляць на фронт па 25–50 чалавек у месяц, а тыя, хто жадае пазбегнуць службы, паводле даных выдання, могуць заплаціць ад 250 да 500 тыс. рублёў.

«Усё жыццё — вайна», — так некаторыя чачэнцы тлумачаць сваё рашэнне адправіцца на фронт, успрымаючы цяперашні канфлікт як працяг папярэдніх войнаў.