Амбудсмен па правах чалавека звярнуўся ў МУС Польшчы наконт доўгай легалізацыі замежнікаў
- 12.08.2026, 11:40
Гэта важна і для беларусаў.
Запуск сістэмы MOS не вырашыць праблему занадта доўгай легалізацыі замежнікаў, асабліва калі яна звязаная з дэфіцытам кадраў. Такую пазіцыю заняў офіс амбудсмена па правах чалавека Польшчы, які звярнуўся ў МУС Польшчы з нагоды зацягвання спраў аб відзе на жыхарства, піша Most.
Ведамства мяркуе, што запуск Модуля абслугоўвання кліентаў (сістэмы MOS), праз які заявы на від на жыхарства цяпер падаюцца ў электроннай форме, змяншае адміністрацыйную нагрузку, звязаную з рэгістрацыяй спраў і ўстараненнем фармальных недахопаў. Але гэта не вырашае праблем на наступных этапах. Таму ўкараненне MOS павінна суправаджацца сістэмнымі рашэннямі, якія ахопліваюць увесь ход вядзення справы.
Да 4 сакавіка 2027 года ў Польшчы замарожаныя тэрміны разгляду спраў аб легалізацыі. Заявы па-ранейшаму разглядаюцца і рашэнні прымаюцца, але дзяржаўныя органы больш не абавязаныя ўкладацца ў устаноўлены законам тэрміны. Гэта прыводзіць да таго, што працэс расцягваецца на нявызначаны час.
Артыкул 100d закона аб дапамозе ўкраінскім уцекачам, паводле якога тэрміны разгляду спраў замарожаныя, з’яўляецца каменем спатыкнення. Упаўнаважаны па правах чалавека, спасылаючыся на судовую практыку, адзначае, што гэты артыкул не павінен прымяняцца ў кожнай справе аб легалізацыі.
МУС Польшчы прызнае, што ваяводскі адміністрацыйны суд, які разглядае скаргі заяўнікаў на бяздзеянне чыноўнікаў або зацягванне спраў, можа вынесці рашэнне, не ўлічваючы артыкул 100d. Але ўпраўленні па справах замежнікаў, у адрозненне ад адміністрацыйных судоў, не валодаюць паўнамоцтвамі на праверку канстытуцыйнасці палажэнняў законаў. Таму яны абавязаныя прымяняць гэты артыкул.
У міністэрстве лічаць, што павелічэнне з 2022 года колькасці грамадзян Украіны ў Польшчы стала адным з ключавых фактараў росту нагрузкі на дзяржаўныя органы — ужонды. Калі ў 2021 годзе ва ўсе ваяводскія ужонды паступіла 361,3 тыс. заяў на часовы від на жыхарства, то ў 2025-м — 508,1 тыс., з якіх 288,9 тыс., або 56,5%, падалі грамадзяне Украіны. За першыя пяць месяцаў 2026 года паступіла яшчэ 212,2 тыс. заяў. З іх 142,1 тыс., або 67%, падалі ўкраінцы.