Пуцін дапусціў фатальную памылку

• Іван Прэабражэнскі
• 12.08.2026, 12:30

Тэндэнцыі відаць зусім выразна.

Расійскія ўлады недаацанілі, наколькі само грамадства ў Расіі стамілася ад расійскай агрэсіі супраць Украіны, ад вайны, ад таго, што вайна перанеслася на тэрыторыю самой Расіі. Яны не ўспрымалі сур'ёзна нават тыя сацыялагічныя апытанні, якія самі заказвалі і публікавалі, згодна з якімі больш за палову, істотна больш за палову расіян так ці інакш выступаюць за тое, каб баявыя дзеянні былі завершаныя і пачаліся нейкія мірныя перамовы.

Пры гэтым абсалютна зразумела, што ніякай сур'ёзнай сацыялогіі ў Расіі няма. Але тэндэнцыі відаць зусім выразна. Расійскія ўлады лічылі, што партыя «Яблоко» настолькі замшэлая, забытая і нікому не цікавая, што, калі дадаткова ачысціць яе ад найбольш актыўных сябраў партыі, ад пазнавальных асобаў, то пасля гэтага на яе ўвогуле ніхто не зверне ўвагі.

І, відаць, яна спакойна атрымае 1–2% на гэтых так званых выбарах. Пры гэтым трэба памятаць, што гэта не выбары, гэта не партыя, гэта не парламент, у які яны абіраюцца. Усё гэта да таго ж абсалютна незаконна, бо так званыя выбары праводзяцца на акупаваных тэрыторыях Украіны, то бок іх у прынцыпе ніяк нельга прызнаць.

Увогуле расійскія ўлады проста лічылі, што «намалююць» «Яблоку» столькі, колькі захочуць, а потым абвесцяць, што гэты 1% — гэта і ёсць тыя самыя нацыянальныя здраднікі, якія выступаюць супраць нашай «вялікай непазбежнай перамогі» над Украінай, якія не падтрымліваюць нашага «вялікага нацыянальнага лідара» Уладзіміра Пуціна. З імі будуць разбірацца адпаведныя органы, і на гэтым тэму можна будзе закрыць.

Раптам высветлілася, што пачынаецца абсалютна непрадказальная мабілізацыя. У геаметрычнай прагрэсіі расце колькасць тых, хто пачынае публікаваць нейкія яблыкі. У сацыяльных сетках моладзь, якая, здаецца, дакладна не павінна была нават ведаць пра існаванне партыі «Яблоко» і ніколі ў жыцці не чула імя яе стваральніка Грыгорыя Яўлінскага, раптам таксама пачынае неяк у гэтым удзельнічаць.

Значная частка эміграцыі пачынае выказвацца ў такім ключы, што трэба скарыстаць гэтыя магчымасці: калі не падтрымліваць «Яблоко», дык хаця б правесці якуюсьці агітацыю за мір, якая з улікам выбарчай кампаніі, можа быць, будзе адносна законнай. І, можа быць, людзей, якія пачнуць у гэтым удзельнічаць, не пералоўяць і не перасаджаюць.

Складаецца ўражанне, што ўсё гэта пачынала ператварацца ў снежны ком. І расійскія ўлады, незалежна ад рэальнай прычыны рэгістрацыі «Яблока», пачалі дзейнічаць. Ёсць канспіралагічныя версіі, што гэта барацьба вежаў — маўляў, адна вежа спрабавала падставіць іншую, што сілавікі змагаюцца з адміністратарамі з Адміністрацыі Прэзідэнта. Але ў дадзеным выпадку гэта зусім не істотна.

Так ці інакш расійская ўлада зрабіла фатальную памылку і хутка пачала выпраўляць яе даступнымі ёй спосабамі. То бок вырашыла зняць партыю «Яблоко» з так званых выбараў, закрыць гэтую тэму і такім чынам прадэманстраваць, што не трэба нічога казаць пра спыненне расійскай агрэсіі. Нельга выкарыстоўваць словы «вайна», «мір», нават слова «пацыфізм». Усё зноў вяртаецца да той рэпрэсіўнай мадэлі, якая ўкаранялася пасля пачатку поўнамаштабнай агрэсіі, то бок прыкладна ў 2022–2023 гадах.

Іван Прэабражэнскі, «Главред»