Экс-гендырэктара ААТ «Белавежскі» будуць судзіць за хабар

• 12.08.2026, 12:39

Гаворка ідзе пра 365 тысяч долараў.

Былога генеральнага дырэктара аднаго з найбуйнейшых аграпрамысловых прадпрыемстваў краіны ААТ «Белавежскі» будуць судзіць за атрыманне хабару ў асабліва буйным памеры. Разам з ім на лаве падсудных апынуўся і хабародавец. Падрабязнасці расследавання паведамілі ў пракуратуры.

Паводле версіі абвінавачання, з жніўня 2024 года па ліпень 2025 года фігурант, які ў той час узначальваў «Белавежскі», прыняў ад прадстаўніка пяці камерцыйных арганізацый 365 030 токенаў USDT (Tether USD) TRC20, што эквівалентна 365 030 долараў. Лічбавыя актывы праз пасярэдніка былі пералічаныя на крыптакашалёк абвінавачанага.

Незаконнае ўзнагароджанне мужчына атрымаў за арганізацыю бесперабойнай пастаўкі фірмам мясной прадукцыі ў патрэбных аб'ёмах, а таксама за куплю ў іх пшаніцы.

Абвінавачаныя віну прызналі. Экс-гендырэктар «Белавежскага», як паведамляецца, «прыняў меры» па сплаце даходу, атрыманага злачынным шляхам. Яго будуць судзіць па ч. 3 арт. 430 Крымінальнага кодэкса (Атрыманне хабару). Санкцыя артыкула прадугледжвае ад пяці да пятнаццаці гадоў пазбаўлення волі.

Прадстаўніка камерцыйных арганізацый будуць судзіць па ч. 3 арт. 431 Крымінальнага кодэкса. Яму пагражае ад пяці да дзесяці гадоў калоніі.

Абодва фігуранты чакаюць суда ў следчым ізалятары.