Мінскі парк Чалюскінцаў пачнуць абнаўляць у кастрычніку

• 12.08.2026, 14:14

Чым заменяць «Ладдзю» і «Кола агляду»?

Рэканструкцыя парка Чалюскінцаў у Мінску пачнецца ў кастрычніку 2026 года. Нагадаем, што нядаўна праект рэканструкцыі выносіўся на грамадскае абмеркаванне. Пра дэталі будучага добраўпарадкавання расказаў генеральны дырэктар «Мінскзелянбуду» Аляксандр Ярмалавіч, паведамляюць «Мінск-Навіны».

Канцэпцыя абнаўлення будзе амаль аналагічнай той, што была паспяхова рэалізаваная ў Цэнтральным дзіцячым парку імя Горкага. У прыватнасці, на тэрыторыі зоны адпачынку абновяць пліткавае пакрыццё і заменяць інжынерныя сеткі: старыя камунікацыі пракладаліся даўно і ўжо не спраўляюцца з павялічанай энерганагрузкай гандлёвых аб’ектаў. Апошнія, дарэчы, таксама абновяцца.

Асобная ўвага будзе нададзена забаўляльнай інфраструктуры. Жыхары горада раней выказвалі занепакоенасць наконт лёсу трох папулярных атракцыёнаў — «Кола агляду», «Катальнай гары» і «Ладдзі». Аляксандр Ярмалавіч запэўніў, што яны не знікнуць, а будуць замененыя.

— Гэтыя атракцыёны адпрацавалі свой вызначаны тэрмін эксплуатацыі і цяпер утылізуюцца. Пасля заканчэння рэканструкцыі ў парку будуць усталяваныя аналагічныя атракцыёны, а таксама з’явяцца яшчэ некалькі — ужо да наступнага сезона, — паведаміў кіраўнік «Мінскзелянбуду».

Першую добраўпарадкаваную частку парка павінны запусціць да адкрыцця сезона працы атракцыёнаў, а поўнасцю завяршыць маштабнае абнаўленне тэрыторыі плануюць да канца 2027-га.