«Беларускія партызаны працуюць вельмі добра»

• 12.08.2026, 16:00

Лукашысцам складана схаваць падрыхтоўку да вайны.

Жыхар Мікашэвіч aleksei96659 расказаў у Threads пра тое, што ў раёне РУП «Граніт» ужо стаяць два комплексы «Тор-М2К». Нягледзячы на тое, што ўлады хаваюць гэты факт, пра яго хутка стала вядома.

«Складаецца ўражанне, што беларускія партызаны працуюць вельмі добра, — піша ён. — Нават у маім невялікім раёне пасля разгортвання зенітна-ракетнага комплексу «Тор-М2К» на РУП «Граніт» інфармацыя пра гэта стала вядома праз два дні.

Беларусь можа здавацца невялікай краінай, але, калі людзі сапраўды звяртаюць увагу на тое, што адбываецца вакол, доўга нешта хаваць становіцца вельмі складана».

Паводле яго слоў, комплексы атрымала 120-я асобная гвардзейская механізаваная брыгада, і яны ўжо знаходзяцца на тэрыторыі прадпрыемства.

«Калі ёсць рэальная пагроза, чаму б не прызнаць гэта адкрыта? Калі гэта дэманстрацыя сілы, то дзе гарантыя, што заўтра туды не паляцяць дроны?» — пытаецца ён.