The Times: Крэмль ахоплены страхам

• 12.08.2026, 17:58

Пуцін страціў упэўненасць у сабе.

Рэйтынг адабрэння Пуціна рэзка ўпаў да мінімуму з пачатку вайны, а большасць расіян, паводле «Левада-цэнтру», хочуць мірных перамоваў.

Выданне The Times піша, што «няўпэўнены ў сабе Уладзімір Пуцін» рэзка актывізаваў паездкі па Расіі і «спадзяецца, што яны дапамогуць падняць папулярнасць, якая падае».

Гэта адбываецца на фоне страху Крамля праз зніжэнне яго рэйтынгу і падтрымкі ягонай вайны супраць Украіны. Калі на пачатку года ён рэдка пакідаў Маскву, магчыма, баючыся замаху, то за апошнія тры тыдні наведаў ужо шэсць гарадоў. Паводле ацэнак аналітыкаў, такія паездкі павінны прыблізіць прэзідэнта да людзей і падтрымаць яго рэйтынг.

Паводле даных звязанай з Крамлём сацыялагічнай кампаніі ФОМ, у ліпені адабрэнне Пуціна ўпала да 66% — мінімальнага ўзроўню з пачатку поўнамаштабнай вайны супраць Украіны. Аналітыкі лічаць, што рэальная падтрымка можа быць яшчэ ніжэй.

Адзін з такіх візітаў адбыўся ў Новасібірску. Перад прыездам Пуціна горад спешна прывялі да ладу: адрамантавалі дарогі, падрамантавалі тратуары, падкасілі траву. Мясцовыя жыхары іранізавалі, што ўлады літаральна перабудоўваюць горад за некалькі дзён. «Яны практычна перабудоўваюць горад за тры дні», — напісаў адзін з жыхароў у сацсетках.

Апазіцыйная журналістка Фарыда Рустамава кажа, што рэйтынг адабрэння даўно стаў для Пуціна галоўным індыкатарам стану сістэмы.

«Ужо даўно рэйтынг адабрэння [Пуціна] з'яўляецца для яго галоўным паказчыкам становішча спраў у краіне. Гэта пульс сістэмы, і ўся машына працуе дзеля падтрымання гэтага ўзроўню. Ён шчыра верыць, што яго публічныя выступы супакойваюць людзей. Даўно даказана, што гэта не так, але ён у гэта верыць», — сказала яна.

Расійскі апазіцыйны журналіст Міхаіл Фішман лічыць, што змена рыторыкі Пуціна сведчыць пра няўпэўненасць Крамля ў узроўні грамадскай падтрымкі вайны.