Украінскія дроны пачалі паляванне на грузавікі Wildberries

• 12.08.2026, 18:19

Фуры кампаніі падвяргаюцца атакам на маршрутах у акупаваны Крым.

Украінскія вайскоўцы атакуюць грузавікі Wildberries, што перавозяць тавары ў Крым. Па меншай меры ў двух выпадках паведамлялася пра паспяховае паражэнне транспарту, яшчэ ў адным беспілотнік не трапіў у грузавік. Акаўнт OSINT technical 4 жніўня паведаміў пра знішчэнне грузавіка Wildberries і апублікаваў наступствы атакі, а таксама пазначыў каардынаты здарэння.

20 чэрвеня камандзір 422-га асобнага палка беспілотных сістэм LUFTWAFFE Мікалай Калеснік паведаміў пра атаку ўкраінскіх дронаў на грузавікі Wildberries. Ён заявіў, што мэтай атакі было парушэнне расійскай лагістыкі, перадае 24 канал. Яшчэ адзін эпізод адбыўся 24 мая. Паводле даных канала «Ваенны асведаміцель», украінскі беспілотнік RAM-2X спрабаваў атакаваць фуру Wildberries, якая накіроўвалася ў Крым па трасе Р-280 «Наварасія». Аднак дрон не трапіў у грузавік і паразіў прыдарожную прыбіральню.

Атакі на грузавікі — частка аперацыі Украіны па аслабленні расійскай лагістыкі. За чэрвень украінскія вайскоўцы паразілі каля 600 грузавікоў, у тым ліку 80 бензавозаў, паведамляў «Крымскі вецер». З-за іх у Крыме ўжо больш за два месяцы працягваецца паліўны крызіс і праблемы з пастаўкамі прадуктаў. У сувязі з гэтым расійскія ўлады ўвялі ліміты продажу бензіну і дызпаліва прыватным асобам і арганізацыям, а цэны на паліва выраслі ў некалькі разоў.