40 аб’ектаў у Мінску засталіся без гарачай вады

• 13.08.2026, 17:48

Сярод іх — дзіцячыя сады і школы.

У Мінску 40 аб’ектаў часова засталіся без гарачай вады з-за рамонту цепласеткі, паведамілі ў «Мінскэнерга».

Работнікі «Мінскэнерга» 13 жніўня выявілі пашкоджанне трубаправода ў раёне дома № 60А на вуліцы Нестарава.

Цяпер на месцы ідуць аварыйна‑аднаўленчыя работы. Задзейнічана спецтэхніка. Энергетыкі лакалізуюць пашкоджаны ўчастак і рыхтуюць яго да замены.

На перыяд рамонту прыпынена гарачае водазабеспячэнне ў спажыўцоў «Мінкамунцепласетак» у 23 жылых дамах, 11 адміністрацыйных будынках, чатырох дзіцячых садках і дзвюх школах.