Лукашэнка падзяліўся вынікамі вар’яцкага эксперыменту

• 13.08.2026, 21:25

Дыктатар угнаіў поле соллю.

Лукашэнка 13 жніўня сустракаўся пад Мінскам з перадавікамі жніва. Там у размове з кіраўніком агракамбіната «Ждановічы» Грыгорым Чуйко ён распавёў пра тое, як ідзе прапанаваны ім эксперымент з салігорскімі адваламі солі:

«Памятаеш, я гаварыў пра тое, каб гэтыя адходы калійнага камбіната вывезці пабольш і ўкласці ў бедныя землі. Вось мы ўзялі поле… Ты, напэўна, не ўнікаў — там Турчын кантралюе. Унеслі гэтыя адходы, другое поле — арганіка, а трэцяе поле — арганіка з гэтымі адходамі. Кукурузу пасеялі. Ну, канешне, год такі нетыповы — кукуруза шыкоўная. Пры гэтым на ўсіх трох участках. Там гэтым займаюцца навукоўцы».

Зазначым, што адходы калійнай вытворчасці — гэта ў асноўным паваранная соль.

Варта нагадаць, ідэю Лукашэнкі разнёс вучоны-хімік Сяргей Бесараб.

Сяргей Бесараб лічыць, што прапанаваны Аляксандрам Лукашэнкам «надзвычай просты, але вар’яцкі па сваёй сутнасці рэцэпт» можа прывесці да сур’ёзных экалагічных праблем.

Паводле яго слоў, высокая канцэнтрацыя соляў у глебе ў кароткатэрміновай перспектыве здольная выклікаць так званы асматычны шок. Калі ўтрыманне соляў у глебавым растворы значна перавышае асматычны ціск унутры каранёў раслін, яны губляюць здольнасць паглынаць ваду. Больш за тое, асматычныя працэсы пачынаюць выцягваць вільгаць з клетак вонкі. У выніку насенне можа ўвогуле не прарасці з-за хларыднай інтаксікацыі, а ўсходы, што з’явіліся, будуць хутка гінуць. Урэшце поле рызыкуе ператварыцца ў бясплодную саланчаковую паверхню.

Навуковец таксама звяртае ўвагу на доўгатэрміновыя наступствы. Ападкі паступова будуць вымываць солі ў больш глыбокія слаі глебы. Пры гэтым іёны натрыю здольныя выцясняць кальцый з глебавага комплексу, што разбурае структуру грунту. Урэшце глеба, якая і так магла быць бедным пяском, з цягам часу стане падобнай на цвёрды цэмент у перыяд засухі і на вязкую, дрэнна паветрапранікальную гразь у вільготнае надвор’е.