У Арменіі затрымалі дэпутата партыі пралукашэнкаўскага алігарха

• 13.08.2026, 22:39

Яго абвінавачваюць у падкупе выбаршчыкаў.

У Арменіі затрымалі былога дэпутата парламента Мартуна Грыгар'яна па справе аб падкупе выбаршчыкаў. Пра гэта паведамляе Армянская служба «Радыё Свабода». Яго даставілі ў Антыкарупцыйны камітэт.

Грыгар'ян падчас парламенцкіх выбараў уваходзіў у спіс кандыдатаў ад партыі «Працвітаючая Арменія», якая ў выніку не прайшла ў Нацыянальны сход.

У маі 2026 года сілавікі правялі вобшук у яго доме і ў офісе партыі, а таксама канфіскавалі дакументы і камп'ютары. Тады Грыгар'ян заявіў, што яны шукалі дакументы, чэкі і іншыя звесткі пра пералічэнні сродкаў, звязаныя з выбарамі ў парламент.

У ліпені ў Арменіі затрымалі лідэра «Працвітаючай Арменіі» мільярдэра Гагіка Царукяна, яго абвінавацілі ў буйным махлярстве і адмыванні грошай. У жніўні па справе аб заказным забойстве арыштавалі яго зяця і былога дэпутата Аргама Абрамяна.

Гагік Царукян і Аляксандр Лукашэнка падтрымліваюць цесныя сувязі — Царукян называе яго «сваім сябрам». Пасольства Беларусі ў Арменіі знаходзіцца побач з асабняком Царукяна ў вёсцы Арындж на ўскраіне Ерэвана.