У Мінску прадалі кватэру за рэкордныя $1,2 мільёна

• 14.08.2026, 11:58

Гэта самая дарагая здзелка з жыллём у сталіцы за ліпень.

У мінулым годзе на вуліцы Грыбаедава з’явіўся дом з брутальным фасадам. Комплекс на 33 кватэры атрымаў назву «Аб’ект 6». У ліпені менавіта ў ім прадалі кватэру за 1,2 мільёна долараў, што стала рэкордам для рынку, піша Realt.by. Атрымліваецца, новабудова ўжо другі раз абышла такія мінскія жылыя комплексы, як Depo і «Алімпік Парк». Распавядаем, якая кватэра трапіла ў топ самых дарагіх у Беларусі.

Нагадаем, што «Аб’ект 6» налічвае 2 пад’езды, 6 паверхаў і 33 рэзідэнцыі. Будынак у ціхім куточку побач з Саборнай мячэццю праектавала студыя M5 Architects. Вонкавая асаблівасць дома — фасад з кортэнавай сталі.

Пасля паспяховых продажаў пачатку лета (калі ў спіс дарагой нерухомасці трапілі адразу тры дарагія кватэры ў «Аб’екце 6») ліпень прайшоў больш спакойна. У комплексе «засвяцілася» толькі адна кватэра: самым дарагім у Мінску стала чатырохпакаёвае жыллё плошчай 168 квадратных метраў. Прасторную рэзідэнцыю на чацвёртым паверсе набылі за 1,2 мільёна долараў. Атрымліваецца, цана за метр у кватэры склала 7161 долар. Новы рэкорд для сталічнага рынку!

Адзначым, што кватэры ў Depo ў ліпені таксама прадаваліся. Так, тут за 530 тысяч долараў набылі двухпакаёвую кватэру плошчай 83 квадратныя метры. Цану за метр у кватэры ацанілі ў 6325 долараў. Трэцяй у спісе самай дарагой жылой нерухомасці Мінска стала кватэра ў «Алімпік Парку». Прасторную чатырохпакаёвую кватэру плошчай 164 квадратныя метры набылі за 515 тысяч долараў (сціплыя 3131 долар — за метр).