Іга Свёнтэк вярнулася на вяршыню сусветнага тэніса

• 14.08.2026, 13:55

Польская тэнісістка трыумфальна выйграла турнір у Таронта.

Польская тэнісістка Іга Свёнтэк выйграла прэстыжны турнір катэгорыі WTA 1000 у Таронта. У фінале полька перамагла казахстанскую тэнісістку Алену Рыбакіну з лікам 6:2, 6:3, паведамляе «Польскае радыё».

Гэта найбуйнейшы трыумф Ігі Свёнтэк амаль за год — апошні раз яна перамагала на турніры ў Паўднёвай Карэі. З перамогай яе павіншаваў прэзідэнт Польшчы Кароль Навроцкі.

Амерыканскія СМІ адзінгалосна падкрэсліваюць, што польская тэнісістка вяртаецца на вяршыню. У фінале Алена Рыбакіна ніяк не магла супрацьстаяць Свёнтэк, якая дэманстравала выдатную гульню. Трыбуны ў Таронта літаральна былі запоўнены польскімі балельшчыкамі — менавіта ў гэтым горадзе пражывае найбуйнейшая польская дыяспара ў Канадзе.

На цырымоніі адразу пасля матчу Іга Свёнтэк узгадала апошнія месяцы, якія былі для яе вельмі няпростымі.

«Хачу прысвяціць гэты тытул усім, хто сутыкаецца з несправядлівай ацэнкай і хейтам. Проста не здавайцеся, развівайцеся і канцэнтруйцеся на сабе, бо вы ведаеце, што для вас лепш; заўсёды памятайце таксама пра тое, што чакае вас наперадзе і якія магчымасці вас чакаюць», — падкрэсліла польская тэнісістка.

З Канады Іга Свёнтэк цяпер накіруецца ў Цынцынаці, дзе пройдзе яшчэ адзін турнір катэгорыі WTA 1000 і дзе яна будзе абараняць свой тытул. Гэта стане для яе апошнім выпрабаваннем перад турнірам Вялікага шлема US Open, які стартуе напрыканцы жніўня.