Расіяне заявілі пра «атаку баброў з НАТА»

• 14.08.2026, 16:43

Звычайная міграцыя жывёл напалохала жыхароў Калінінградскай вобласці.

«Бабры з краін НАТА акупуюць расійскі рэгіён» — такі загаловак РІА «Навіны» дало рэпартажу пра сітуацыю ў самым заходнім рэгіёне краіны. Ужо ў першым сказе дзяржаўнае расійскае агенцтва піша пра масавае нашэсце жывёл з Польшчы і Літвы, піша onet.pl.

Іншыя СМІ паўтараюць гэтае паведамленне, спасылаючыся на рэпартажы папулярнага навінавага канала «База» ў Telegram. Gazeta.ru спачатку папярэджвае, што бабры пагражаюць ураджаю, а «Камсамольская праўда» дадае, што «мясцовыя жыхары б’юць трывогу». У публікацыях выкарыстоўваюцца такія тэрміны, як «пашырэнне» і «нападзенне».

Жыхары Калінінградскай вобласці, як паведамляецца, назіраюць актывізацыю міграцыі баброў на працягу прыкладна двух месяцаў. Жывёлы будуюць загаты, што прыводзіць да павышэння ўзроўню вады ў рэгіёне, затаплення палёў, лясоў і балотных мясцовасцяў.

Больш падрабязную інфармацыю падаў мясцовы навінавы сайт Klops.ru. На пачатку жніўня на рэках вобласці было дэмантавана 43 бабровыя загаты. Паводле дадзеных мясцовых уладаў, у аперацыі па ачыстцы ўдзельнічалі сто чалавек.

Некаторыя з загат знаходзіліся недалёка ад межаў з Польшчай і Літвой. Верагодна, гэтага было дастаткова, каб завуаляваць гісторыю пра мясцовую праблему вайсковай тэрміналогіяй.

За панічнымі загалоўкамі хаваецца значна больш рэалістычная гісторыя. Самі расіяне прапануюць тлумачэнне, якое супярэчыць драматычнаму тону загалоўкаў публікацый.

Як паведамляюць расійскія СМІ, доктар ветэрынарных навук Аляксандр Муромцаў патлумачыў, што жыхары назіраюць натуральны працэс міграцыі баброў. Пры гэтым гэты працэс адбываецца ў абодва бакі. Жывёлы, што жывуць на расійскім баку, таксама мігруюць у суседнія краіны.