ЖЭС адмаўляецца выплачваць мінчанцы кампенсацыю за затапленне

• 14.08.2026, 17:32

Кватэру затапіла яшчэ вясной.

Мінчанка illuvuf паўгода не можа дачакацца ад свайго ЖЭС кампенсацыі за затапленне ў кватэры з-за працяклага даху «хрушчоўкі».

«Мінск, падзяліцеся парадай, — піша яна. — Жыву на пятым паверсе ў «хрушчоўцы», гэтай зімой (відаць, з-за моцных маразоў) нешта адбылося з дахам, і пры пацяпленні мяне затапіла. Цекла некалькі дзён запар, у ЖЭС разводзілі рукамі, сказалі чакаць вясны.

Вясны я дачакалася, падпісала дэфектны акт, паабяцалі выплаціць грошы за шкоду, і пытанне павісла ў паветры. Галоўны інжынер мяне ігнаруе і кажа, што не ён адказвае за выплаты».

Мінчанка спытала ў карыстальнікаў сеткі, куды ёй звярнуцца і колькі яшчэ чакаць выплат.

«Я вам болей скажу, — дадала яна ў адным з каментароў. — Калі яны прыехалі, усё, што мне сказалі: чакайце вясны, добрага вам мужа і ўдачы. На маё пытанне «Як жыць у такіх умовах да поўнавартаснага пацяплення?» (справа была ў студзені) адказу не далі. Так і жыла».

Threads