Навроцкі згадаў беларусаў у прамове на ваенным парадзе

• 15.08.2026, 22:17

Прэзідэнт Польшчы падзякаваў ім за барацьбу з бальшавізмам.

15 жніўня ў Варшаве (прайшоў найбуйнейшы ў гісторыі Польшчы ваенны парад), прысвечаны Дню Войска Польскага і 106-й гадавіне Варшаўскай бітвы. Па Віслострадзе прайшлі амаль дзве тысячы вайскоўцаў і каля 300 адзінак тэхнікі, а над польскай сталіцай праляцелі F-35 і F-16, паведамляе сайт Charter97.org.

Падчас урачыстасцяў прэзідэнт Польшчы Кароль Навроцкі асобна згадаў беларусаў, якія разам з палякамі супрацьстаялі бальшавікам.

«У польскім войску таксама змагаліся тыя, хто хацеў незалежнасці, хто ведаў, што такое бальшавізм. І яны не хацелі, каб бальшавікі распаўсюдзіліся па ўсёй Еўропе — літоўцы, украінцы, беларусы, «белыя» рускія, напалоханыя бальшавізмам, усё гэта ў Рэчы Паспалітай мы цэнім і дзякуем за дапамогу», — заявіў польскі прэзідэнт.

Дзень Войска Польскага (Święto Wojska Polskiego) адзначаецца ў гадавіну перамогі польскага войска ў Варшаўскай бітве 1920 года. Тады польскія войскі спынілі наступ Чырвонай арміі на Варшаву і перайшлі ў контрнаступ. У польскай гістарычнай традыцыі гэтая перамога атрымала назву «Цуд на Вісле».