Расійскія ракетныя катэры заўважылі ля берагоў Японіі

• 16.08.2026, 22:55

Іх зафіксавалі паблізу мыса Соя.

Паблізу мыса Соя на японскім востраве Хакайда зафіксавалі чатыры расійскія ракетныя катэры праекта 12411М «Молния-1», якія накіроўваліся на захад. Пра гэта паведаміў Аб'яднаны штаб Сіл самаабароны Японіі ў сацсетцы X.

Адзначаецца, што за расійскімі караблямі назіралі з дапамогай патрульнага самалёта P-3C, які ўваходзіць у склад 2-га авіяцыйнага крыла Марскіх сіл самаабароны Японіі. Японскі бок заяўляе, што расійскія катэры не перасякалі тэрытарыяльныя воды Японіі, прайшоўшы на адлегласці 40 км ад берага.

У ведамстве паведамілі, што каля мыса Соя праплывалі катэры з бартавымі нумарамі 916, 946, 971 і 978. Гэтыя ж караблі былі выяўленыя 9 жніўня за 70 км на паўночны захад ад вострава Рэбун, пасля чаго яны прайшлі праз праліў Соя на ўсход. Зваротнае праходжанне катэраў адбылося на фоне візіту расійскага дыктатара Уладзіміра Пуціна 13 жніўня на востраў Ітуруп.

У «Мілітарным» адзначылі, што серыя ракетных катэраў праекта 12411М «Молния-1» была распрацаваная Цэнтральным марскім канструктарскім бюро «Алмаз». Першы катэр гэтага праекта быў прыняты на ўзбраенне ў 1981 годзе.

Гэтыя катэры прызначаныя для паражэння надводных цэляў у прыбярэжнай і блізкай марской зонах. Яны адрозніваюцца ад папярэднікаў усталяваннем чатырох звышгукавых супрацькарабельных ракет 3М80 «Москит» замест састарэлых П-15 «Термит».