ISW: Гэта важны сігнал

• 17.08.2026, 7:49

ЗСУ знішчылі 7 з 10 найбуйнейшых складаў Wildberries у Расіі.

Украінскія Сілы абароны нанеслі ўдары і спынілі працу сямі з дзесяці найбуйнейшых лагістычных цэнтраў Wildberries у Расіі у межах ударнай кампаніі, накіраванай на аслабленне расійскай абаронна-прамысловай базы і сеткі лагістыкі двайнога прызначэння. Пра гэта пішуць аналітыкі Інстытута вывучэння вайны, тлумачачы наступствы гэтых удараў.

Так, уначы на 16 жніўня ЗСУ ўдарылі па найбуйнейшым лагістычным хабе Wildberries (плошчай 250 000 квадратных метраў) у індустрыяльным парку Каледзіна ў Падольску Маскоўскай вобласці, прыблізна за 420 кіламетраў ад мяжы з Украінай.

Прэс-служба Wildberries пацвердзіла, што ўдары Украіны выклікалі пажар на аб’екце і прымусілі кампанію рэарганізаваць свае ланцужкі паставак.

Таксама ў ноч з 15 на 16 жніўня ўкраінскія сілы нанеслі ўдар па складзе ў Дамадзедаве Маскоўскай вобласці, прыблізна за 430 кіламетраў ад мяжы.

На пачатку жніўня 2026 года агенцтва Reuters паведамiла, што ўкраінскія ўдары знішчылі прынамсі 1,18 мільёна квадратных метраў складскіх плошчаў Wildberries — пятую частку агульных складскіх магутнасцяў Wildberries на той момант, і ад таго часу ўкраінскія ўдары па кампаніі толькі ўзмацніліся.

Аналітыкі ISW падкрэсліваюць, што ўкраінская ударная кампанія супраць лагістычных цэнтраў Wildberries аказвае дадатковы ціск на расійскую эканоміку і без таго перагружаную сістэму СПА.

«Няздольнасць Расіі абараніць найбуйнейшыя лагістычныя хабы Wildberries, нягледзячы на тое, што ўкраінская кампанія супраць такіх мэт працягваецца, дэманструе, што ў Расіі недастаткова сродкаў СПА для абароны ўсёй неабходнай інфраструктуры ў тыле», — адзначаюць аналітыкі.