У Венгрыі Андраш Бака афіцыйна ўступіў на пасаду прэзідэнта

• 19.08.2026, 12:13

Палітык раней узначальваў Вярхоўны суд Венгрыі і быў зняты з пасады Орбанам.

У сераду, 19 жніўня, Андраш Бака афіцыйна ўступіў на пасаду прэзідэнта Венгрыі.

Пра гэта паведаміў прэм’ер-міністр краіны Петер Мадьяр у сацыяльных сетках.

Як заявіў Мадьяр, Бака, за якога 11 жніўня прагаласавала Нацыянальная асамблея ў якасці новага прэзідэнта Венгрыі, афіцыйна ўступіў на пасаду.

«Жадаю прэзідэнту поспехаў у працы, моцнага здароўя і як мага больш чалавечнасці», — падкрэсліў прэм’ер Венгрыі.

У перыяд з 1991 па 2008 год Бака працаваў у Еўрапейскім судзе па правах чалавека. Пасля гэтага, у 2009 годзе, юрыст узначаліў Вярхоўны суд Венгрыі. Яго кіраўніцтва працягвалася два гады, паколькі яго звольнілі пасля правядзення канстытуцыйнай рэформы. Сам Бака лічыць, што яго звальненне звязана з крытыкай судовай рэформы ўрада Віктара Орбана.

Як вядома, 18 ліпеня ўжо папярэднік Бакі Тамаш Шуйок падпісаў канстытуцыйныя папраўкі, якія, між іншым, прадугледжваюць датэрміновае спыненне яго прэзідэнцкіх паўнамоцтваў.

Пасля таго як парламент Венгрыі, у якім канстытуцыйную большасць мае партыя «Ціса» Петэра Мадьяра, ухваліў канстытуцыйныя папраўкі, у Шуйока было 5 дзён, каб падпісаць рашэнне або накласці на яго вета.

Падчас перадвыбарчай кампаніі лідар партыі «Ціса» Петер Мадьяр абяцаў, што ў выпадку атрымання канстытуцыйнай большасці зменіць Канстытуцыю і адхіліць ад пасад прызначаных папярэдняй уладай чыноўнікаў, якіх ён называў «марыянеткамі» Орбана, у тым ліку і прэзідэнта Шуйока.