«Мне не пачулалася?»: беларуску шакавала цана за новы пашпарт
- 19.08.2026, 14:19
У МУС патлумачылі, адкуль такія лічбы.
Жыхарка Лунінца Антаніна згубіла пашпарт. Новы дакумент вырашыла зрабіць як мага хутчэй, але, пачуўшы цану, перадумала. Ёй паведамілі, што ў яе горадзе аформіць пашпарт за пяць дзён будзе каштаваць 940 рублёў. Пра гэтую сітуацыю беларуска распавяла ў сваім TikTok. У каментарыях некаторыя пачалі дзівіцца, як такое можа быць, піша «Зеркало».
Антаніна прапісаная ў Лунінцы. Паводле слоў жанчыны, нядаўна яна пайшла ў свой АГіМ, каб аформіць новы пашпарт, бо стары згубіўся. Да гэтага, распавядае яна ў відэа, прачытала ў інтэрнэце, што срочнае афармленне каштуе дзве базавыя велічыні, або 90 рублёў.
— Я ўжо ў надзеі, што ўсё так проста і лёгка, прыбягаю ў пашпартны стол, падаю ўсе дакументы, кажу: «Мне максімальна хутка, за сем дзён», — апісвае ў роліку сваю сітуацыю аўтарка. — На што мне кажуць: «У нас няма сямі дзён, у нас ёсць пяць. І мы вам зробім за 940 беларускіх рублёў». Я тут, вядома, ашалела. У мяне вочы на лоб палезлі. Кажу: што? Мне не пачулася, вы не агаварыліся? Дакладна? Не 94, а 940? Мне адказваюць: так.
Жанчыне патлумачылі: прычына ў тым, што дакументы трэба везці ў Брэст. А гэта прыблізна 225 кіламетраў ад Лунінца. Кошт дастаўкі і складае асноўную частку такой уражальнай сумы. Гэта здзівіла Антаніну.
— Вядома, я не пагадзілася на гэтыя ўмовы, — прызнаецца яна і кажа, што вырашыла пачакаць. — Бо я не алігарх, выбачайце, мне ўвогуле цікава, ці хто-небудзь у Лунінцы робіць за такія грошы хутка пашпарт? Хоць я разумею, што калі няма выбару, то аддасі апошнія грошы. Але ў любым выпадку, мне здаецца, гэта не сумленна перад грамадзянамі Рэспублікі Беларусь, што жывуць у розных кутках краіны. Мне здаецца, гэта павінна быць усё фіксавана і аднолькава, нягледзячы на тое, у якім горадзе ты пражываеш. І адкуль увогуле такая цана — 940 беларускіх рублёў? Гэта проста касмічныя грошы, лічу, за пашпарт.
За два дні ролік Антаніны паглядзелі больш за 250 тысяч разоў, пад ім звыш 540 каментарыяў. У іх хтосьці дзівіцца названай суме, хтосьці жартуе, што, магчыма, дакументы павязуць у Брэст, які знаходзіцца ў Францыі. Але былі і тыя, хто з падобнай цаной сутыкаўся і ў іншых населеных пунктах. Вось некаторыя з такіх паведамленняў:
«У Іванаве таксама вельмі дорага!»
«У Пінску сем дзён — 135 рублёў».
«Так, мы таксама такія «разумныя»… Хацелі за сем дзён, і ў гэтую суму ўваходзіць «залаты» бензін! У абласных гарадах фіксавана, а далей лічаць усе выдаткі. У нас 150 кіламетраў да абласнога, і трэба было заплаціць каля 700 рублёў».
«Мінулым годам тэрмінова мужу трэба было замяніць пашпарт для выезду ў адпачынак: 880 рублёў — і пашпарт гатовы цягам пяці дзён. Давялося браць ID-карту за 330, Баранавічы».
«Два гады таму рабілі ў Магілёўскай вобласці за 400 рублёў, але нам так і сказалі: дзве базавыя велічыні за сам пашпарт, астатняе — кур’ерская дастаўка туды і назад».
«У мяне таксама падобная сітуацыя, толькі налічылі 560 [рублёў], гэта за тэрміновасць дастаўкі, як мне патлумачылі. Бо для [працы з] маім пашпартам будзе выдзелена асобная машына і асобны чалавек».
«Сяброўка ў кастрычніку 2025-га таксама аддавала пад тысячу беларускіх рублёў за хуткае атрыманне. Я таксама спачатку не паверыла, думала, яна нешта не так зразумела. Але не, давялося плаціць. Гомельская вобласць».
«Гэта не навіна. У 2023 годзе рабіла пашпарт, бо трэба было тэрмінова пераязджаць у іншую краіну, і кошт таксама быў высокі. Дакладнай сумы не памятаю, але таксама была ў шоку».
Што кажуць у пашпартным стале?
У красавіку 2026-га Дэпартамент па грамадзянстве і міграцыі МУС нагадваў: тэрміны вырабу галоўнага дакумента ў звычайным парадку займаюць месяц, у паскораным — 15 дзён, а ў Мінску і абласных цэнтрах ёсць магчымасць зрабіць яго яшчэ хутчэй — за сем дзён. Пры гэтым для біяметрычнага пашпарта тэрміны іншыя: 15 рабочых дзён — у звычайным парадку, 10 — у паскораным і пяць — у тэрміновым.
На Нацыянальным прававым партале адзначана: кошт звычайнай замены дакумента абыдзецца ў адну базавую велічыню, цяпер гэта 45 рублёў. У паскораным парадку — 90, у тэрміновым — 135.
У аддзяленні па грамадзянстве і міграцыі Лунінецкага РАУС, куды журналістка «Зеркала» звярнулася як звычайная грамадзянка, сказалі, што ў іх можна зрабіць пашпарт за месяц, 15 дзён і пяць. У першым выпадку гэта каштуе 45 рублёў, у другім — 90.
— А пяць дзён (каля пяці працоўных) — у раёне 940 рублёў, — паведаміла супрацоўніца і патлумачыла, чаму так шмат: — Ваш адзіны пашпарт вязуць [у Брэст], чакаюць, [пакуль зробяць новы], і прывозяць назад. То-бок [фактычна] гэта робіцца літаральна за дзень, але [атрымліваеце вы яго] цягам пяці дзён.
Яна патлумачыла, што, магчыма, у гарадах, якія знаходзяцца бліжэй да абласнога цэнтра, гэтая ж паслуга каштуе танней.
— А паколькі мы самая, можна сказаць, аддаленая кропка [ў вобласці], то 940, — адзначыла суразмоўніца.
У якасці альтэрнатывы яна прапанавала аформіць ID-карту і біяметрычны пашпарт. Максімальна хутка гэта можна зрабіць за пяць дзён, і працэдура каштуе 340 рублёў.
— Тут вы на месцы прыходзіце, афармляецеся, — уводзіць у курс справы спецыялістка. — Мы ў электронным выглядзе адпраўляем усё гэта ў Брэст, а потым ужо [дакументы] прыходзяць да нас.