Украінскі камандзір роты сам паехаў на пікапе пад агнём, каб выратаваць цяжкапараненых байцоў

• 19.08.2026, 22:15

Ён стаў Героем Украіны.

На адным з участкаў фронту ў Харкаўскай вобласці расійскі беспілотнік падбіў наземную робатызаваную платформу, якая эвакуіравала дваіх цяжкапараненых украінскіх ваенаслужачых палка «Code 9.2». Здавалася, што ім ужо нічога не дапаможа, але адбылося нечаканае.

Як паведаміла Групаванне аб'яднаных сіл ЗСУ, двое ўкраінскіх штурмавікоў паспяхова выканалі баявую задачу і захапілі варожыя пазіцыі. Аднак падчас вяртання іх атакавалі расійскія дроны «Молния». Абодва ваенаслужачыя атрымалі цяжкія раненні і ўжо не маглі самастойна рухацца.

Для эвакуацыі да іх накіравалі наземную робатызаваную платформу, але расійскі беспілотнік атакаваў і падбіў яе.

Пакуль на камандна-назіральным пункце шукалі спосаб вывезці параненых з-пад прыцэльнага агню, аэраразведка заўважыла на дарозе грамадзя́нскі пікап, які на вялікай хуткасці накіроўваўся проста ў небяспечную зону.

За рулём быў камандзір штурмавой роты Уладзіслаў Польскі. Ён сам паехаў ратаваць сваіх байцоў і нават не паспеў надзець бранежылет. Камандзір змог вывезці параненых і тым самым уратаваў ім жыццё.

За гэты ўчынак прэзідэнт Украіны Уладзімір Зяленскі прысвоіў Уладзіславу Польскаму званне «Герой Украіны».

«Выдатная гісторыя. Вялікая смеласць. І прыклад учынку камандзіра, вартага пераймання. Трэба дбаць пра людзей. Дзякуй, Уладзіслаў!» — сказаў Зяленскі.