У Расіі пачалася паніка з-за «украінскіх «Пасейдонаў»»

• 20.08.2026, 8:18

Прапагандысты ў прамым эфіры заявілі, што чакаюць удараў нечуванай сілы па РФ.

Пракрамлёўскія прапагандысты прызнаюць, што здольнасці Украіны паражаць мэты ў Расіі ўзмацняюцца, і дадаюць, што цяперашнія ўдары — гэта толькі пачатак, а далей па расійскай тэрыторыі пачнуць дзейнічаць украінскія балістычныя ракеты і міні-падлодкі, якія нагадваюць расійскую ядзерную тарпеду «Пасейдон», піша «Дыялог.UA».

Пра гэта ў эфіры радыё «Камсамольская праўда» заявіў расійскі палітолаг і прапагандыст Андрэй Клінцэвіч.

Ён нагадаў, як некаторыя прапагандысты ў РФ раней смяяліся з назвы ўкраінскай крылатай ракеты «Фламінга», а цяпер гэта ракета, маса баявой часткі якой складае больш за тону, паспяхова паражае мэты на расійскай тэрыторыі.

Далей Клінцэвіч прадказвае ўдары ўкраінскай балістыкі. «Балістыка з баявой часткай 600–900 кг паляціць — гэта сур'ёзна. Гэта не 50 кг», — заявіў ён.

Акрамя таго, прапагандыст спаслаўся на даныя выведкі краіны-агрэсара, паводле якіх «Украіна масава выпускае цяжкія беспілотныя міні-падлодкі», якія маюць вялікія памеры і здольныя пераадольваць тысячы кіламетраў з тонай выбухоўкі.

На ўдакладняльнае пытанне іншага прапагандыста Івана Панкіна, ці мае ён на ўвазе безэкіпажныя катэры, Клінцэвіч адказаў, што гэта значна больш магутная зброя, і параўнаў яе з расійскімі «Пасейдонамі». «Не, гэта проста тарпеды, нешта кшталту нашага «Пасейдона», — заявіў прапагандыст.

Заўважым, паводле заяваў расійскага боку, «Пасейдон» з'яўляецца беспілотным падводным апаратам з ядзернай энергетычнай устаноўкай. Яго прызначэнне — паражэнне партоў і марскіх баз як за кошт уласных паражальных фактараў, так і за кошт «цунамі, што ўзнікае пры выбуху».