Лукашэнка звольніў першага намесніка начальніка Генштаба

• 20.08.2026, 14:26

Маціевіч звольнены ў запас па ўзросце.

Генерал-маёр Андрэй Маціевіч вызвалены ад пасады першага намесніка начальніка Генеральнага штаба Узброеных Сіл Беларусі. Указ пра гэта 20 жніўня падпісаў Аляксандр Лукашэнка, паведаміла прэс-служба дыктатара.

Генерал звольнены з ваеннай службы ў запас па ўзросце — з правам нашэння ваеннай формы адзення і знакаў адрознення.

Андрэй Маціевіч нарадзіўся 2 верасня 1971 года ў вёсцы Вялікае Альжэва Лідскага раёна. Вучыўся ў Мінскім Сувораўскім вучылішчы, затым скончыў Алмацінскае вышэйшае агульнавайсковае каманднае вучылішча, пазней — Агульнавайсковую акадэмію Узброеных Сіл РФ імя Фрунзэ і Акадэмію Генштаба Узброеных Сіл РФ. Усе навучальныя ўстановы ён скончыў з залатым медалём або чырвоным дыпломам.

Служыў у Галоўным аператыўным упраўленні Генштаба, а з 2020 года ўзначальваў тэрытарыяльную абарону. Пагоны генерал-маёра атрымаў у 2021 годзе з рук самога Лукашэнкі. У 2023 годзе той прызначыў Маціевіча спачатку намеснікам начальніка Генштаба, а затым і першым намеснікам начальніка Генштаба.