Літва будуе для НАТА ваенны лагер каля мяжы з Беларуссю

• 20.08.2026, 17:54

Гэта найбуйнейшы ваенны аб'ект у гісторыі краіны.

Урад Літвы плануе пабудаваць на палігоне Руднінкай, недалёка ад мяжы з Беларуссю, новы ваенны лагер для нямецкіх салдат і іншых войскаў НАТА, піша Die Zeit.

Лагер разлічаны больш як на 1000 вайскоўцаў, якія будуць удзельнічаць у вучэннях у гэтай балтыйскай краіне. На тэрыторыі плошчай у сем гектараў за суму каля 40 млн еўра ўзвядуць жылыя і гаспадарчыя пабудовы, неабходную тэхнічную інфраструктуру і транспартныя камунікацыі; завяршыць будаўніцтва плануецца ў першай палове 2028 года.

Мэта ўрада Літвы — стварыць спрыяльныя ўмовы для войскаў НАТА, каб яны маглі праводзіць вучэнні ў краіне, а пры неабходнасці — і дыслакавацца там.

«Мы стратэгічна і комплексна інвестуем у ваенную інфраструктуру, каб як нямецкая брыгада, так і вайскоўцы іншых саюзнікаў па НАТА маглі якасна трэніравацца ў Літве і мелі належныя ўмовы жыцця», — заявіў міністр абароны Робертас Каўнас.

Будаўніцтва ваеннага аб'екта плошчай 190 гектараў з'яўляецца найбуйнейшым праектам ваеннай інфраструктуры ў гісторыі Літвы.

Бундэсвер ужо фармуе ў Літве 45-ю танкавую брыгаду, асноўным месцам дыслакацыі якой стане менавіта Руднінкай. Урад Германіі прыняў рашэнне аб яе стварэнні ў адказ на нарастаючую пагрозу з боку Расіі. Да 2027 года злучэнне павінна стаць цалкам баяздольным, налічваючы 4800 вайскоўцаў і 200 грамадзянскіх супрацоўнікаў, а таксама ўзяць на сябе камандаванне шматнацыянальнай баявой групай у Літве.

Казарму пабудуюць у лясістай мясцовасці, абвешчанай палігонам літоўскай арміі спецыяльным законам у маі 2022 года — неўзабаве пасля пачатку поўнамаштабнага ўварвання Расіі ва Украіну.