Сястра Кіма Чэн Ына: КНДР не цікавяць апошнія крокі Трампа

• 20.08.2026, 22:23

Яна таксама абвергла сцвярджэнне прэзідэнта ЗША пра тое, што Кім Чэн Ын адказаў на яго зварот.

КНДР не цікавяць апошнія крокі прэзідэнта ЗША Дональда Трампа, які скараціў сумесныя ваенныя вучэнні з Паўднёвай Карэяй. Пра гэта, як піша The New York Times, заявіла ўплывовая дарадца і сястра дыктатара Паўночнай Карэі Кім Ё Чжон.

Паводле яе слоў, скарачаныя вучэнні ўсё адно з'яўляюцца «правакацыйнымі і агрэсіўнымі».

«Калі ЗША разлічваюць, што іх нядаўнія меры будуць успрынятыя як праява добрай волі, яны не атрымаюць жаданага адказу. Гэта для нас не ўяўляе цікавасці», — заявіла Кім Ё Чжон, выступіўшы як прадстаўніца ўрада свайго брата.

Яна таксама абвергла сцвярджэнне Трампа пра тое, што Кім Чэн Ын адказаў на яго зварот, заявіўшы, што «не ведае» пра якія-небудзь кантакты паміж Пхеньянам і Вашынгтонам.