У Расіі дазволілі людзям без рукі або нагі кіраваць аўтобусамі

• 22.08.2026, 11:55

У РФ рыхтуюцца ўладкоўваць на працу «герояў СВА».

Урад Расіі выключыў з пераліку медыцынскіх супрацьпаказанняў для кіравання грамадскім і грузавым транспартам шэраг дыягназаў, звязаных з адсутнасцю або сур’ёзнай дэфармацыяй рук, ног, кісцей, ступняў і пальцаў, піша The Moscow Times.

Пра гэта вынікае з распараджэння Кабміна, апублікаванага на партале прававой інфармацыі. Адначасова ўведзена новае абмежаванне: абсалютным супрацьпаказаннем цяпер лічыцца адначасовая адсутнасць абедзвюх верхніх канечнасцяў або абедзвюх кісцей або іх дэфармацыя, «якая істотна ўскладняе рух». Такім чынам, кіраваць аўтобусамі і грузавікамі афіцыйна дазволена людзям з ампутацыяй адной рукі або адной нагі.

З ініцыятывай у кастрычніку мінулага года выступіў кіраўнік Агульнарасійскага аб’яднання пасажыраў (ООП) Ілья Зотаў. Ён адзначаў, што для ваджэння аўтобуса з аўтаматычнай каробкай перадач левая нага не патрэбная, заклікаючы прыцягваць да працы кіроўцамі «герояў СВА», якія атрымалі інваліднасць. Па ацэнцы Зотава, такое рашэнне не будзе ўяўляць небяспекі для пасажыраў і дазволіць удзельнікам уварвання ва Украіну зарабляць «больш за 100 тысяч рублёў» штомесяц у дадатак да пенсіі па інваліднасці. «Важна, каб яны працавалі, былі карысныя грамадству. І галіна ад гэтага выйграе, і людзі будуць запатрабаваныя», — казаў ён.