У беларускай Вышэйшай лізе ўпершыню футбольны матч абслугоўвала цалкам жаночая судзейская брыгада

• 22.08.2026, 12:55

Гістарычная падзея.

Учорашні матч 19‑га тура Вышэйшай лігі паміж «Мінскам» і «Віцебскам» увайшоў у гісторыю беларускага футболу. Упершыню сустрэчу чэмпіянату краіны сярод мужчынскіх каманд абслугоўвала цалкам жаночая судзейская брыгада, піша onliner.by.

Галоўным арбітрам матча стала ўраджэнка Маладзечна Вольга Блоцкая. Ёй дапамагалі мінчанка Анастасія Данчэнка і Алеся Гутнік з Брэста. Абавязкі чацвёртага арбітра выконвала Валянціна Сакалавіч з Жодзіна.

Сустрэча завяршылася перамогай «Віцебска» з лікам 1:0.

Для Блоцкай гэта быў ужо чацвёрты матч у мужчынскай «вышцы» — у красавіку арбітр стала першай жанчынай, якая ўзначаліла судзейскую брыгаду ў элітным футбольным дывізіёне Беларусі. Аднак ва ўсіх папярэдніх матчах у яе камандзе працавалі і мужчыны.

Жаночыя брыгады пад кіраўніцтвам Блоцкай таксама абслугоўвалі матчы Кубка Беларусі. У 2025 годзе такіх матчаў было тры. Аднак і тады чацвёртым суддзёй кожны раз працаваў мужчына.