«Не хачу абмяжоўваць сябе»: сям’я немцаў, што пераехала ў Беларусь, вытрымала толькі 4,5 года
- 23.08.2026, 8:42
Яны вяртаюцца ў ЕС.
Чатыры з паловай гады таму Патрык і Ганна Шнайдэры купілі дом у вёсцы Агароднікі Слуцкага раёна. Сям’я з двума дзецьмі пераехала з Германіі, хваліла Беларусь у інтэрв’ю дзяржТБ. Цяпер яны прадаюць дом і збіраюцца ў ЕС.
Праз 4,5 года сям’я пакідае Беларусь, заўважыла «Салідарнасць».
— Напэўна, самая важная прычына — гэта фінансы, — распавядае Ганна Шнайдэр у рылз у Інстаграме. — Раней я думала, што жыць з недастатковай колькасцю сродкаў будзе не так цяжка, што калі ёсць усе выгоды, ёсць свой агарод, то гэтага ў прынцыпе дастаткова, крыху дзесьці зарабляць і жыць.
Але цяпер я разумею, што не хачу проста жыць, існаваць. Я хачу таксама дазволіць сваім дзецям пападарожнічаць, дазволіць сваім дзецям купіць тое, што яны хочуць, і не стаяць і лічыць кожную капейку.
Па словах Ганны, больш за ўсё яна зарабіла за месяц тысячу рублёў. І гэта быў сакавік, калі яна тры дні запар гандлявала каля цюльпанаў. Яна рабіла кандытарскія вырабы, хлеб, тофу і расліннае малако — усё без цукру, без глютэну і без прадуктаў жывёльнага паходжання.
Патрык займаўся рэканструкцыяй дома, які сям’я цяпер прадае за 90 тысяч долараў.
Ганна ўзгадвае, што пасля прыезду ў Беларусь уладкавалася медсястрой на паўстаўкі і зарабляла 350 рублёў.
— Цяпер, праз чатыры гады, я на тым жа самым месцы магла б зарабляць дзесьці 750 рублёў, але больш як на паўстаўкі я не магу пайсці з-за дзяцей, з-за прыгатавання ежы. Патрыку працаваць дзесьці на будоўлі з яго дрэннай рускай мовай і атрымліваць дзесьці падсобнікам паўтары тысячы — гэта, вядома, ні пра што. У Мінску мы, напэўна, мелі б удвая больш.
Па падліках Ганны, максімум яны маглі б зарабіць 2,5 тысячы рублёў.
— Я не хачу абмяжоўваць сябе ў харчаванні, я хачу купляць сабе свежую садавіну і гародніну. А мы веганы. Веганская ежа тут не распаўсюджаная, даводзіцца рабіць усё самім.
Ганна лічыць, што першапачаткова сям’і трэба было ехаць у Мінск, але сужэнцы хацелі жыць падалей ад вялікіх шумных гарадоў, хацелі свежае паветра, вёску, свой агарод.
— Я хачу мець магчымасць звезці дзяцей на мора і добра карміць, — напісала ў каментарыях Ганна.
Вось яшчэ адна цытата з яе каментарыяў да паста: «У Аўстрыі на поўнай стаўцы зарабляла больш за 2000 еўра».
У наступным відэа яна назвала яшчэ адну прычыну ад’езду. Па літарах вымавіла слова «вайна», адзначыўшы, што баіцца яго вымаўляць.
— Усюды нешта будзе, дзесьці больш, дзесьці менш. Не ў добрыя часы мы жывём, на жаль. Таму трэба выбраць, дзе ты хочаш у гэты час быць і з кім, і мы вырашылі ўсё ж такі быць побач з роднымі, у звыклым асяроддзі, — патлумачыла жанчына.