Трамп падтрымаў ідэю выкарыстання Starlink для удараў па РФ
- 23.08.2026, 11:20
Зяленскі кажа, што цяпер свой дазвол павінен даць Маск.
Прэзідэнт Украіны Уладзімір Зяленскі раскрыў падрабязнасці перамоваў аб магчымасці выкарыстання спадарожнікавай сістэмы сувязі Starlink для нанясення удараў углыб тэрыторыі Расіі. Пра гэта ён распавёў падчас сустрэчы з журналістамі, перадае карэспандэнт unian.net.
Па словах Зяленскага, у першай палове гэтага года Мінабароны Украіны прапанавала яму знайсці магчымасць дамовіцца з прэзідэнтам ЗША Дональдам Трампам аб выкарыстанні Starlink у гэтых мэтах. Пры гэтым у абаронным ведамстве заяўлялі, што адпаведная дамоўленасць з кіраўніком SpaceX Ілонам Маскам ужо дасягнутая. Аднак, як высветлілася ўжо падчас перамоваў Зяленскага з Трампам, Маск насамрэч такога дазволу Украіне не даваў.
«У мяне была другая сустрэча з прэзідэнтам ЗША. Ён сказаў, што я нібыта падмануў яго, таму што Маск адмовіў Украіне ў выкарыстанні Starlink на тэрыторыі Расіі. Я вярнуўся ў наша Міністэрства абароны, і там сказалі, што, магчыма, так і было… Наколькі нам вядома, Ілон Маск лічыў, што гэта можа стаць сур'ёзнай эскалацыяй супраць РФ з боку Украіны — так мне патлумачылі. Ён казаў, што выступае за спыненне вайны, а не за яе працяг. Так і мы за спыненне вайны, а не за яе працяг, але для гэтага патрэбныя адпаведныя інструменты», — распавёў Зяленскі.
Прэзідэнт адзначыў, што цяпер Украіна працягвае дыялог з Трампам з гэтай нагоды, аднак пакуль складана прагназаваць, ці атрымае Кіеў адпаведны дазвол ад Вашынгтона.
«Я зрабіў тое, аб чым мяне папрасілі. Зрабіў гэта ў ходзе двух сустрэч. Таксама ў Версалі гэта за мяне зрабіў прэзідэнт Макрон з прэзідэнтам Трампам. У іх была вялікая сустрэча. Эманюэль зрабіў усё, каб растлумачыць наш намер і тое, як гэта можа прыблізіць завяршэнне вайны, і прэзідэнт Трамп сказаў: «Добра, я буду падтрымліваць ідэю са Starlink». Мы гэта вельмі цэнім. І Алекс Стубб таксама дапамог. Мы ўсе працавалі над тым, каб прэзідэнт Трамп даў згоду, і я ўдзячны, што ён сапраўды разгледзеў гэтую перспектыву і ўбачыў пазітыўную магчымасць прыблізіць завяршэнне вайны», — дадаў Зяленскі.
Раней выданне Financial Times паведамляла, што Украіна дамагаецца ад Ілона Маска дазволу на выкарыстанне дронаў, абсталяваных сістэмай Starlink, для удараў па пускавых устаноўках балістычных ракет на адлегласці да 200 км углыб тэрыторыі Расіі.
Пры гэтым выданне адзначала, што Маск дазваляе Украіне выкарыстоўваць Starlink для абароны ўласнай тэрыторыі, аднак не дае згоды на прымяненне сістэмы для удараў па тэрыторыі Расіі.