Гіркін: Чарнаморскі флот РФ разгромлены

• 23.08.2026, 13:23

Астаткі трапілі ў пастку ў «Наварасійску».

Асуджаны расійскі прапагандыст, экс-лідар тэрарыстаў «ДНР» Ігар Стралкоў (Гіркін) чарговы раз выступіў з песімістычнымі ацэнкамі ходу вайны. На гэты раз ён фактычна прызнаў, што праз чатыры з паловай гады баявых дзеянняў Украіна дасягнула істотнай перавагі над Расіяй. Адпаведны пост з’явіўся ў ягоным Telegram-канале.

Каментуючы знішчэнне тэрмінала ў Наварасійску, а таксама пашкоджанні найноўшых расійскіх ваенных караблёў «Адмірал Макараў» і «Адмірал Эсэн», Стралкоў заявіў, што расійскі флот фактычна спыніў сваё існаванне як баявая сіла.

«Нашы чарнаморскія порты фактычна заблакаваныя, наш Чарнаморскі флот на трэць знішчаны, а астатнія дзве траціны загнаныя на апошнюю базу, але і там іх дастаюць і працягваюць біць, хоць яны і так патрапаныя да няздольнасці да любых актыўных аперацый. Уступіўшы ў „СВА“ з абсалютнай перавагай на моры, мы праз 4 ½ года апынуліся ў абсалютнай роўнасці з Украінай. Ды і тое ў яе перавага ў безэкіпажных катэрах — колькасная і якасная. Брава! Брава, Унікальная Перавага!» — напісаў Стралкоў.

Асобную трывогу ў ваеннага злачынцы выклікае тое, што Украіна працягвае актыўна нарошчваць удары па расійскіх тылах з дапамогай беспілотнікаў і ракет. Паводле ягоных слоў, украінскі бок, у адрозненне ад расійскага кіраўніцтва, не толькі робіць гучныя заявы, але і насамрэч выконвае абяцанае.

«ЗСУ цяпер насамрэч, як і абяцаў Фёдараў менш за год таму, штодня накіроўваюць у Расію ад 500–600 да 1600 БПЛА. І ад месяца да месяца іх колькасць бесперапынна расце. І з ракетамі таксама „неўвязачка“. Так, ПАКУЛЬ мы здольныя запускаць іх значна больш… Але мы ўжо не валодаем абсалютнай перавагай, а ўдары ЗСУ, калі ўзяць іх у прапорцыі запушчаных ракет да паражаных „балючых“ мэтаў, значна эфектыўнейшыя, на жаль, за нашы», — канстатаваў Стралкоў.