Сёстры з Віцебска знайшлі фота памерлай маці на чужым помніку
- 23.08.2026, 14:24
Дазволу на выкарыстанне фотаздымка яна не давала.
Жыхарка Віцебска паскардзілася на майстэрню па вырабе помнікаў. Паводле слоў жанчыны, кампанія выставіла надмагілле з фотаздымкам яе памерлай маці, хоць сям'я заказвала яго ў іншым месцы і дазволу на выкарыстанне фотаздымка не давала, паведамляе партал Vitebsk.biz.
Паводле слоў віцяблянкі, яе маці памерла ў 2021 годзе падчас пандэміі каранавіруса, а помнік сям'я заказвала і вырабляла ў іншай арганізацыі.
9 чэрвеня 2026 года жанчына выпадкова ўбачыла ў інтэрнэце фота надмагілля з партрэтам сваёй маці. Вытворцам аказалася ТАА «Нагірус», якое працуе пад назвай «Граніт і мармур».
«На маё слушнае пытанне: „Адкуль і з чыйго дазволу?“ пачула гісторыю, што гэта мой помнік, які я ў іх заказала і ад яго адмовілася. На мой катэгарычны адказ бачу абыякавае — „Разбярэмся“. На гэтым перапіска спынілася», — расказала яна.
На наступны дзень, не атрымаўшы адказу, віцеблянка патэлефанавала ў фірму, але, паводле яе слоў, размова прайшла на павышаных тонах.
«Хамства, абыякавасць, павышаныя тоны з пытаннямі: „Чаго вы хочаце???“, „Чаму вы нервуецеся???“ — былі асновай нашай размовы. „Прыбяром!“ — і кінулі трубку», — напісала жанчына.
Фотаздымак помніка з сайта, паводле яе слоў, пасля гэтага сапраўды выдалілі.
Аднак 12 жніўня, больш чым праз два месяцы пасля інцыдэнту, сястра віцеблянкі прыйшла ў фірму і ўбачыла той жа помнік з партрэтам іх маці на месцы — яго, як сцвярджаецца, толькі перасунулі прыкладна на метр.
«Адразу ж патэлефанавала ў дадзеную [арганізацыю]. Так, градус дыялогу быў павышаны, але я пачула: „Не трэба тут крычаць!!!“ І кінулі трубку», — расказала аўтарка.
У той жа дзень яна сама прыбыла ў майстэрню, сфатаграфавала помнік і пакінула запіс у кнізе заўваг і прапаноў. У звароце жанчына спаслалася на Закон «Аб абароне персанальных дадзеных» і запатрабавала прыбраць медальён з фотаздымкам, а таксама даць пісьмовы адказ.
«Іншых варыянтаў развіцця падзей я не бачу, бо замест згладжвання непрыемнай сітуацыі і выбачэнняў — у адказ мне цішыня», — напісала гараджанка.
Чым скончылася гісторыя, пакуль невядома, але сама жанчына паабяцала давесці яе «да канца».