Навукоўцы знайшлі два шляхі ўздзеяння на галаўны мозг для зніжэння вагі

• 23.08.2026, 14:42

Даследчыкі правялі паспяховае даследаванне на мышах.

Навукоўцы з Кембрыджскага ўніверсітэта знайшлі два шляхі ўздзеяння на галаўны мозг, якія могуць дапамагаць зніжаць вагу. Даследаванне на мышах паказала, што актывацыя і блакіроўка аднаго і таго ж рэцэптара — GIPR — даюць падобны вынік, але дзейнічаюць праз розныя ўчасткі галаўнога мозгу. Праца апублікаваная ў часопісе Nature Metabolism.

Даследнікі вывучылі ролю GIPR — рэцэптара глюкозазалежнага інсулінотропнага паліпептыду, які ўдзельнічае ў рэгуляцыі апетыту і абмену рэчываў. Навукоўцы выкарыстоўвалі генетычна мадыфікаваных мышэй, у якіх гэты рэцэптар адсутнічаў у асобных абласцях галаўнога мозгу.

Высветлілася, што прэпараты, якія актывуюць GIPR, пераважна ўздзейнічаюць на мазгавы ствал. Актывацыя рэцэптара ў гэтай вобласці змяншала апетыт і прыводзіла да памяншэння масы цела.

Блакіроўка таго ж рэцэптара дзейнічала інакш. У гэтым выпадку ключавой апынулася іншая вобласць мозгу — гіпаталамус. На думку навукоўцаў, GIPR у гіпаталамусе дзейнічае як своеасаблівы «тармаз», якія абмяжоўвае рэакцыю мозгу на сігналы насычэння. Яго блакіроўка дазваляе сігналам сытасці дзейнічаць мацней, што таксама спрыяе зніжэнню спажывання ежы і масы цела.

Даследнікі выявілі, што блакіраванне GIPR можа ўзмацняць эфект іншых прэпаратаў для лячэння атлусцення, у тым ліку тых, што ўздзейнічаюць на рэцэптары GLP-1. Такі прынцып ужо выкарыстоўваецца ў некаторых прэпаратах, што распрацоўваюцца, аднак эфектыўнасць і бяспеку падобных камбінацый яшчэ трэба пацвердзіць у клінічных выпрабаваннях.

Аўтары адзначаюць, што вынікі дапамагаюць лепш зразумець механізм дзеяння сучасных прэпаратаў для зніжэння вагі. На іх думку, ўздзеянне на розныя ўчасткі мазгавых ланцугоў у будучыні можа дазволіць ствараць больш эфектыўныя камбінацыі лекаў і дасягаць большай страты вагі пры меншай колькасці пабочных эфектаў.

Пры гэтым даследаванне праводзілася на мышах, таму пакуль невядома, ці будуць выяўленыя механізмы працаваць у людзей такім жа чынам.