Замежнікі ў Варшаве выходзяць на мітынг з-за доўгага чакання відаў на жыхарства
- 24.08.2026, 9:00
Акцыю ўзгаднілі ўлады горада.
24 жніўня ў цэнтры Варшавы пройдзе мітынг супраць зацягвання спраў аб легалізацыі замежнікаў. Акцыю запланавалі каля будынка мэрыі горада на Plac Bankowy 3/5 з 12:00 да 14:00. Арганізатары паведамілі рэдакцыі vitrina.pl, што правядзенне сходу ўжо ўзгоднена з мэрыяй Варшавы.
За акцыяй стаіць нядаўна створаная грамадская ініцыятыва Głos Migranta.
– Блізкі мне чалавек сутыкнуўся з доўгімі тэрмінамі чакання. Мы прайшлі амаль усе інстанцыі, але ў адказ — цішыня. Пры гэтым у замежніка, які пасля трох гадоў чакання карты побыту (віда на жыхарства — рэд.) выйшаў з плакатам да ўжонда, справу разглядзелі літаральна адразу. Учынак мужчыны мяне натхніў. І цяпер, каб прыцягнуць увагу да праблемы, мы хочам сабраць перад Мазавецкім ужондам людзей, якія таксама сутыкнуліся з працяглымі тэрмінамі разгляду спраў. Мерапрыемства абсалютна легальнае — мы падалі заяўку ў мэрыю Варшавы і атрымалі ўзгадненне на правядзенне мітынгу 24 жніўня з 12:00 да 14:00, — распавёў Vitrina.pl арганізатар.
Удзельнікі ініцыятывы падкрэсліваюць, што замежнікам даводзіцца чакаць рашэння па 12, 18 і больш месяцаў. За гэты час узнікаюць праблемы з паездкамі за мяжу, вядзеннем бізнесу і звычайным планаваннем жыцця.
Адзін з галоўных пунктаў акцыі — патрабаванне скасаваць артыкул 100d так званай украінскай спецуставы. Цяпер гэтая норма распаўсюджваецца не толькі на ўкраінцаў. Яна прыпыняе цячэнне тэрмінаў разгляду цэлага шэрагу спраў замежнікаў, якімі займаюцца ваяводы, у тым ліку заяў на часовы і пастаянны від на жыхарства і статус доўгатэрміновага рэзідэнта ЕС. Дзеянне нормы працягнута да 4 сакавіка 2027 года.
Больш за тое, у гэты перыяд да такіх спраў не прымяняюцца звычайныя палажэнні аб бяздзейнасці органа і зацягванні працэдуры. Менавіта супраць гэтай сітуацыі выступаюць арганізатары мітынгу. Яны патрабуюць вярнуць стандартныя тэрміны разгляду спраў, прадугледжаныя Кодэксам адміністрацыйнага працэсу Польшчы (KPA).
— Мы выконваем сваю частку сацыяльнага кантракта і не просім пра прывілеі. Мы патрабуем скасавання бестэрміновых затрымак, вяртання да нормаў KPA і базавай павагі да нашых правоў, — заяўляюць арганізатары.
Асобна ініцыятары акцыі звяртаюць увагу на ўклад замежнікаў у польскую эканоміку. Паводле апошніх дадзеных GUS, у студзені 2026 года ў Польшчы працавалі каля 1,12 млн замежнікаў — на 7,1% больш, чым годам раней.
Мітынг заяўлены як мірны публічны сход. Далучыцца да яго арганізатары запрашаюць замежнікаў незалежна ад грамадзянства, а таксама палякаў, якія падтрымліваюць патрабаванні акцыі.
Калі: 24 жніўня, 12:00–14:00
Дзе: Plac Bankowy 3/5, Варшава