Галоўнага расійскага прапагандыста Дзмітрыя Кісялёва прыбралі з «Вестей недели»

• 24.08.2026, 13:52

Гэтую праграму ён вёў з 2012 года.

Прапагандыст Дзмітрый Кісялёў перастане весці выніковую праграму «Вести недели» на тэлеканале «Расія». Яго месца зойме дэпутат Дзярждумы і тэлевядучы Яўген Папоў, паведаміла прэс-служба ВГТРК. Кісялёў вёў «Вести недели» з верасня 2012 года, паведамляе The Insider.

Пры гэтым Кісялёў застанецца на тэлеканале. З 6 верасня ён будзе весці новую штотыднёвую публіцыстычную праграму пад назвай «Киселев», у якой, як заяўляе ВГТРК, прадставіць «аўтарскі погляд» на асноўныя падзеі ў Расіі і свеце. Яна будзе выходзіць па нядзелях а 22:00.

Кісялёў таксама застаецца генеральным дырэктарам дзяржаўнай медыягрупы «Россия сегодня». ВГТРК прычыны замены вядучага «Вестей недели» не называе.

«Вести недели» — адна з галоўных прапагандысцкіх праграм расійскага дзяржаўнага тэлебачання. Перадача, што выходзіць па нядзелях, спалучае навінавыя сюжэты з палітычнымі каментарыямі і рэгулярна транслюе крэмлёўскія наратывы пра вайну супраць Украіны, Захад і ўнутраную палітыку Расіі. Кісялёў быў яе нязменным вядучым з 2012 года.

Пра звальненне Кісялёва з праграмы і яго замену на Папова на мінулым тыдні паведаміў канал «ВЧК-ОГПУ». Таксама ён пісаў, што Кісялёў страціць пасаду генеральнага дырэктара «Россия сегодня».