Беларускі шахматыст: Не ведаю, на што патраціць $190 тысяч прызавых

• 25.08.2026, 17:48

Беларус заняў другое месца на Esports World Cup.

Беларускі гросмайстар Дзяніс Лазавік расказаў пра 190 тысяч долараў прызавых, якія ён павінен атрымаць за другое месца на Esports World Cup 2026, піша «Трыбуна».

– За паразу ў фінале, паводле звестак арганізатараў, ты павінен атрымаць суму ў памеры 190 тысяч долараў. Яны ўжо на руках?

– Так, усё верна – 190 тыс. Пакуль мне іх не пералічылі, але гэта нармальна. Павінна прайсці пэўны час. Яшчэ выплацяць. Праўда, напэўна сума будзе меншая — не ведаю, якая там спецыфіка французскага падаткаабкладання. Вось нядаўна ўдзельнічаў у спаборніцтвах у Расіі. Там давялося аддаць 30% ад сумы прызавых на падаткі.

– Гэта самы вялікі чэк за адны спаборніцтвы ў тваёй кар'еры?

– Так, адназначна. Ужо не памятаю, колькі да гэтага атрымліваў за адзін турнір, але гэта дакладна самыя вялікія прызавыя.

– Ужо ведаеш, на што патраціш?

– Шчыра кажучы, не ведаю. У мяне асаблівай патрэбы ні ў чым няма. Камп'ютар ёсць, тэлефон – таксама, – сказаў Лазавік.