WSJ раскрыў мэту сакрэтнага візіту кіраўніка ЦРУ ў Расію
- 25.08.2026, 20:53
Джон Рэткліф мог прывезці папярэджанне Крамлю.
Нечаканы візіт у Маскву кіраўніка ЦРУ ЗША Джона Рэткліфа, самалёт якога ў аўторак прызямліўся ва «Внукова» і праз толькі некалькі гадзін вылецеў назад, можа быць звязаны з інфармацыяй разведкі пра будучыя планы Уладзіміра Пуціна, піша The Wall Street Journal.
Згодна з разведданымі, расійскія вайскоўцы правялі вучэнні па падрыхтоўцы мабілізацыі ў Калінінградскай вобласці, а таксама іншых рэгіёнах, правяраючы інфраструктуру Мінабароны на гатоўнасць прыняць навабранцаў, забяспечыць іх харчаваннем і зброяй. Акрамя таго, разведка ЗША атрымала дадзеныя, што Пуцін можа паспрабаваць праверыць на трываласць НАТА, піша WSJ.
Падчас візіту Рэткліф, відаць, сустракаўся з Пуціным. Паводле звестак карэспандэнтаў крэмлёўскага пула, расійскі прэзідэнт адмяніў запланаваныя на аўторак мерапрыемствы, хоць яны загадзя рыхтаваліся і планавалася ўдзел вялікай колькасці людзей.
Аналітыкі лічаць, што Рэткліф мог прывезці Пуціну папярэджанне, піша WSJ. «Мэтай магло быць сказаць: «мы ведаем, што ты задумаў, і лепш гэтага не рабі», — кажа Бэтт Саннер, былая намесніца кіраўніка нацыянальнай разведкі ЗША. «Гэта таксама магло быць звязаным з перамір'ем у Іране і далучэннем кагосьці яшчэ да перамоваў», — не выключае Саннер.
Украінскія СМІ пішуць, што мэтай візіту Рэткліфа магло быць абмеркаванне ўзаемнага расійска-ўкраінскага мараторыя на ўдары па энергетыцы і партах. Таксама абмяркоўвалася спыненне агню ў Сумскай і Харкаўскай абласцях як крокі да агульнай дэскалацыі.
The iPaper звязвае візіт Рэткліфа з магчымым абменам зняволенымі. Вайсковы самалёт ЗША прылятаў у Расію ў лютым, калі Пуцін пагадзіўся адпусціць 63-гадовага школьнага настаўніка Марка Фогеля, асуджанага ў Расіі па абвінавачанні ў кантрабандзе наркотыкаў. На каго абмянялі Фогеля, засталося невядомым. Раней пры ўдзеле ЦРУ адміністрацыя Дональда Трампа дамаглася вызвалення журналіста The Wall Street Journal Эвана Гершковіча і марпеха Пола Уілана. Абодвух асудзілі па артыкуле аб шпіянажы.
Борт Рэткліфа пакінуў Внукова каля 18.50 па Мінску і накіраваўся ў бок Латвіі. Следам вылецеў борт спецатрада «Расія», які выкарыстоўваецца для перавозкі вышэйшых службовых асоб РФ.