У Мінску адразу ў двух месцах утварыліся вялізныя чэргі

• 25.08.2026, 21:57

Высветлілася, што людзі стаяць за адным і тым самым.

Ля двух басейнаў у Мінску ў апошнія дні ўтварыліся вялізныя чэргі. У адным выпадку людзі прыйшлі запісвацца на заняткі, у другім — набываць абанементы. Улады патлумачылі ажыятаж высокім попытам, піша дзяржаўнае агенцтва «Мінск-Навіны».

Раніцай 24 жніўня больш за 40 чалавек сабраліся ля ўваходу ў басейн сярэдняй школы № 224 на вуліцы Міхаіла Пташука, 17. Паводле слоў мясцовых жыхароў, чарга працягвалася і ўнутры будынка.

Як патлумачылі ў адміністрацыі Ленінскага раёна, у той дзень адкрыўся запіс на наведванне басейна. Ахвотных аказалася шмат, таму дакументы адначасова прымалі чатыры супрацоўнікі.

Запісацца жыхары Лошыцы могуць да 31 жніўня. З 1 верасня ў басейне пачнуцца платныя заняткі. У новым навучальным годзе там плануюць адкрыць 42 дзіцячыя групы і сем дарослых груп.

У адміністрацыі таксама заявілі, што з наступнага паўгоддзя хочуць часткова перавесці падачу заяў у дыстанцыйны фармат, каб пазбегнуць падобных чаргаў.

За некалькі дзён да гэтага падобная сітуацыя ўзнікла каля басейна «Дружба» на вуліцы Каролінскай, 1, у Брылевічах. У сацсетках паведамлялі, што ахвотных набыць абанементы было столькі, што паміж наведвальнікамі нібыта нават адбываліся сутычкі.

У адміністрацыі Маскоўскага раёна пацвердзілі, што ў дзень продажу абанементаў утварылася вялікая чарга. Для абслугоўвання наведвальнікаў давялося дадаткова выклікаць супрацоўнікаў, а самі абанементы прадавалі ў парадку жывой чаргі.

Цяпер, паводле звестак адміністрацыі, у басейне яшчэ застаюцца вольныя месцы на аздараўленчае плаванне і ў групы навучання плаванню. Яны таксама пачнуць працаваць з 1 верасня.