ЕС назваў кібератакі адной з галоўных пагроз для чыноўнікаў у 2026 годзе

• 26.08.2026, 1:13

Чыноўнікі ЕС сталі мішэнню «дзяржаўнага фішынгу».

У Еўрасаюзе кібератакі на мэсэнджары назвалі адной з галоўных пагроз для высокапастаўленых чыноўнікаў у 2026 годзе. Пра гэта сведчыць унутраная прэзентацыя падраздзялення кібербяспекі ЕС, перадае Politico.

У прэзентацыі адзначаецца, што замежныя ўрады спрабуюць узламаць уліковыя запісы еўрапейскіх чыноўнікаў у мэсэнджарах. Чыноўнікі ЕС сталі мішэнню «дзяржаўнага фішынгу» — кампаній з дзяржаўнай падтрымкай, падчас якіх канкрэтных людзей ашуканска пераконваюць перайсці па сумніўных спасылках або адкрыць шкоднасныя ўкладанні. Кібермахляры выкарыстоўваюць «метады сацыяльнай інжынерыі» і ствараюць персаналізаваныя паведамленні, каб падмануць чыноўнікаў ЕС, паведамляецца ў прэзентацыі.

Паводле звестак Politico, сёлета па меншай меры пяць нацыянальных кіберагенцтваў адзначылі спробы ўзлому ўліковых запісаў у Signal і WhatsApp. Нідэрландскія спецслужбы звязалі інцыдэнты з дзейнасцю расійскіх хакераў. Тады чыноўнікаў папярэджвалі пра махлярскую схему з падробленымі чат-ботамі службы падтрымкі. Так зламыснікі пераконвалі карыстальнікаў падзяліцца сваімі кодамі і захоплівалі іх уліковыя запісы. Выданне адзначае, што згадка кібератак у прэзентацыі — першы зафіксаваны выпадак, калі ўлады ЕС афіцыйна звязваюць такія атакі з замежным урадам.